Foto: Astana qalasy ákimdigi
72 kelide halyqaralyq dodanyń ekinshi tuǵyrynan kóringen el balýanyn Astana áýejaıynan jankúıerleri ystyq yqylaspen qarsy aldy.
Jámıla Baqbergenova Albanııada alǵan kúmisin qosa eseptegende álem chempıonattarynda qazaq qyzdary arasynan 4 márte júlde alǵan alǵashqy balýan atanyp otyr.
«Lısenzııalyq týrnırlerden keıin, bas bapkerimiz ózimizge jumys isteýge múmkindik berdi. Nátıjesinde kezekti júldemdi aldym. Barlyq qarsylasymmen alǵash ret beldestim. Sebebi olardyń birshamasy 68 keliden kóterildi. Fınalda bapkerimniń nusqaýymen japon sportshysyn kútýim kerek edi. Upaı jaǵynan alda turǵanymen, bir ǵana qatelikpen ese jiberip qoıdym. Kúmis medalǵa da jetý ońaı bolmady. Endi áskerıler arasyndaǵy álem chempıonatyna tyńǵylyqty daıyndalamyn. Jalpy ózimdi 72 kelide qolaıly sezinemin. Boıym da, dene bitimim de osy salmaqqa saı», dedi Jámıla Baqbergenova.
Aıta keteıik, otandasymyz altyn úshin aıqasqa deıingi kezeńderde Moldova sportshysy Emılııa Krechýnnen, Eýropa chempıonatynyń qola júldegeri chehııalyq Adel Ganzlıchkovadan, Azııa chempıony mońǵolııalyq Bolortýıaa Zorıgtannan basym túsken bolatyn.
Fınalda japon qyzy Amı Isııge ese jiberdi.
