Baǵa men sapa úılesken
Kásiporyn «Artel» brendimen teledıdar, elektrli sý jylytqysh, shańsorǵysh, asúı toqpeshi, aýasorǵysh, kir jýatyn mashına, jeldetkish sekildi turmystyq tehnıka túrlerin shyǵaryp jatyr. Búginniń ózinde 113 myń tehnıka saýdalanyp úlgergen. Kásiporyn ónimderdi saýda jelileri men ınternet arqyly ótkizip otyr. Atap aıtsaq, turmysqa qajetti tehnıka túrleri «Sulpak», «Technodom.kz», «Evrika», «Mechta.kz», «Alser», «Darmart Astana» sekildi iri saýda núktelerinde satylyp jatyr.
– Kompanııa – elimizdegi turmystyq tehnıka shyǵaratyn jalǵyz óndiris orny. Aldymyzda úlken meje bar. Qurylysty aıaqtaǵanymyzǵa kóp bola qoıǵan joq. Eskirgen ǵımaratty qaıta qalpyna keltirýge zaýytty zamanaýı qajetti jabdyqtarmen qamtamasyz etýge kóp kúsh jumsadyq. Saýdaǵa endi ǵana kiristik. Alǵashqy kórsetkishimiz jaman emes. Bastysy, naryqty baǵamen jaýlaǵaly turmyz. Bizdiń ónim quny syrttan ákeletin turmystyq buıymdarmen salystyrǵanda áldeqaıda tómen. Sapasyna da basa mán beremiz. Iri saýda núktelerinen bólek, ınternet arqyly da saýdany kúsheıtip jatyrmyz. Ásirese «Kaspi.kz» qosymshasy sekildi onlaın saýda platformalaryn tıimdi paıdalanamyz. Satý bólimi menedjerleriniń biliktiligi arqasynda ónimderdi TMD elderine de eksporttaımyz. Bul – kompanııanyń alǵa qoıǵan basty maqsattarynyń biri. Eger shetel naryǵyna shyqsaq, onda kásipornymyz mol tabysqa kenelip, myńdaǵan jumys ornyn ashýǵa múmkindik bolady. Osylaısha, óńir ekonomıkasyn órkendetip ǵana qoımaı, el qazynasyn eseleımiz, – deıdi «Silk Road Electronics» JShS dırektory Aleksandr Krıtskıı.
Irgesi endi bekigen kásiporyn alpaýytqa aınalǵan jaǵdaıda jylyna 1 mln 100 myń turmystyq tehnıkany naryqqa shyǵarady. Sáıkesinshe, eńbek kúshiniń qajettiligi artyp, 1 500 jańa jumys orny ashylady. Buǵan kompanııa basshylyǵy tabandylyqpen, eńbekpen qol jetkizemiz dep otyr.
Jumysshy biliktiligi – áýelgi mindet
Kásiporyndaǵy jumysqa jumysshylar aldymen Saran, Shahtınsk, Qaraǵandy qalasynan qabyldanypty. Qazirdiń ózinde 250-den asa adam turaqty jumys isteıdi. Qyzmetkerlerdi oqytyp, biliktiligin jetildirýge kompanııanyń О́zbekstandaǵy seriktesi qoldaý kórsetipti. Alǵashqy 15 adam Tashkentte taǵylymdamadan ótken. Bul úrdis úzilmeı, áli de jalǵasyp keledi. О́zbekstannan bilikti mamandar Saranǵa arnaıy kelip te oqytyp jatyr.
Alǵashqylardyń biri bolyp Tashkenttegi taǵylymdamadan ótip, jumysqa ornalasqan Mıras Saıyn – qazir kásiporynnyń bildeı bir jaýapty mamany.
– Saran qalasynda bos jumys jármeńkesi ótken bolatyn. Ol kezde kásiporyn áli ashyla qoımaǵan. Sol jerden usynys tústi. Kelistim de Tashkenttegi turmystyq tehnıka shyǵaratyn jeti birdeı zaýyttan tájirıbe tolyqtyryp keldim. Az ýaqyt ishinde asúı peshin qurastyratyn sehty basqarýdy senip tapsyrdy. Bizdiń sehta 25 jumysker bar. Asúı peshiniń «Artel», «Shivaki», «Arg», «Apetito» brendimen 62 túrin qurastyramyz. Kúnine 350–400 pesh ázirleımiz. Olardy tolyq qurastyryp, tehnıkalyq tekseristen jiti ótkizip, esh kedergisiz jumys isteıtinine kóz jetkizip, qaptap, qujatyn sáıkestendirip, qoımaǵa jóneltemiz, – deıdi M.Saıyn.
Sarandyq Marııa Rýl bas aspazdyń kómekshisi bolyp jumysqa turady. Ol sehtyń qaınaǵan jumysyna kirisip ketetinin sol sátte bilmegen edi. Iskerligimen kózge túsken Marııany kadr bólimindegi mamandar keńse jumysyna tartady. Keıin seh jumysyna qyzyǵyp, sonda aýysady.
– Qazir shańsorǵysh sehynda jumys atqaramyn. Bizdiń ýchaskede 20–25 maman jumys isteıdi. Kúnine 300-diń ústinde shańsorǵysh shyǵaramyz. «Artel», «Vesta», «Shivaki» brendimen tehnıkanyń tórt túrin qurastyramyz. Meniń mindetim – daıyn shańsorǵyshty ábden tekserip, qujatyn rásimdep, bazaǵa engizý. Degenmen qurastyrý jumysyn da jetik bilemin, – deıdi Marııa Alekseevna.
Bos jumys orny bar
Kásiporyn jumysshylarǵa barlyq jaǵdaıdy jasap otyr. Joǵary jalaqy, úı men jumys arasynda avtobýspen tasymaldaý, tegin túski as, tolyq áleýmettik paket usynady. Tájirıbe tolyqtyryp, bilim arttyramyn degenderdi arnaıy oqytady. Onda da kúnbe-kún jalaqysy júrip jatady. Zaýytta áli de bos jumys oryndary bar.
«Silk Road Electronics» JShS resmı saıtynda júk tasýshy, logıstıka mamany, elektrmonter, júk kóligin júrgizýshi, júk tıegish kóliktiń júrgizýshisi, ámbebap jumysshy, tazalyq mamany, slesar, gaz qazandyǵynyń operatory, santehnık, menedjer, metrolog, tehnıkalyq baqylaýshy, meddáriger sekildi bos orynǵa habarlandyrý tur. Jumys jónimen kompanııanyń resmı saıtynda kórsetilgen mekenjaıǵa barýǵa, sonda kórsetilgen telefon nómirine habarlasýǵa bolady. Sondaı-aq áleýmettik jelidegi paraqshalary arqyly baılanys ornatý múmkindigi de bar.
Kásiporyn keleshegi
Kompanııa jaqyn kúnderi kóbik plastık óndiretin zaýyt ashýdy, shtamptaý ýchaskesiniń áleýetin tolyq paıdalanýdy josparlaıdy. Bul arqyly óndiristi keńeıtip, tehnıka qurastyrý tıimdiligin arttyrady.
– Bizdiń kompanııa álemdik naryqqa energııaǵa tıimdi, paıdalanýǵa óte yńǵaıly turmystyq tehnıkany shyǵaryp jatyr. Qyzmetkerlerimiz óndiris kezinde tehnıkalyq ınnovasııalardyń ıgiligin kádege jaratýǵa umtylady. О́nim kópshilik talǵamynan shyǵyp, kózge tartymdy kóriný úshin dızaınyna da erekshe mán beremiz. Álemdik brend qalyptastyrý maqsatynda tájirıbemizdi árdaıym tolyqtyryp, izdenisten qol úzbeımiz. Bizdiń kompanııany kóp jumys kútip tur. Otandyq brendti kúni erteń álem moıyndap jatsa, onda Qaraǵandynyń da, Sarannyń da óndirisi ulǵaıady, – deıdi seriktestiktiń qoǵam jáne memlekettik mekemelermen baılanys basqarmasynyń jetekshisi Dılıara Talǵatqyzy.
Qaraǵandy oblysy,
Saran qalasy
