Tııanaqty sharýaǵa – utymdy nesıe

Mal basy óse kele, jemshóp tap­shy­lyǵy sezile bas­ta­dy. Qýańshylyq jyldary tip­ti qıyn jaǵdaıǵa tap boldy. Qaıtpek kerek? Árıne, kim bolsa da mundaıda tyǵyryqtan shyǵar jol izdeıdi ǵoı. Aıdos ta izdendi. Ol jastyǵyna qara­mastan, alystaǵy AQSh-tan bas­tap kúnshyǵystaǵy Japonııada da, Eýropanyń birqatar el­inde de bolǵan azamat. Bir­aq ol bul elderge týrıst bolyp, qy­­dyrystap barǵan joq. О́zi tá­rizdi sharýalardyń tynys-tir­shiligimen tanysyp, oı bó­lisýdi, tájirıbe jınaqtaýdy oılady. Barǵanda kórgenderin oı eleginen ótkizgende kóp múmkindikti paıdalana almaı júrgenin de, orynsyz shyǵynǵa jol beriletinin de, mal ósirgen soń ony jemshóbimen jetkilikti qamtý keregin de uǵyndy. Sóı­tip, jemshóp qoryn ja­saýdyń qamyna kiristi.

Bul rette ol aldymen ózine qarasty jerdi zerttep kórýdi uıǵardy. Nege? О́ıtkeni jer egis­tikke jaramdy ma, joq pa? Qunarlyǵy qandaı bolady eken? Sony bilý kerek edi. Sóıtse, keshegi keńes ýaqytynda bul jerge arpa, bıdaı da, kúnbaǵys, júgeri de, baý-baqsha ónimderi de egilip, ósirilgen eken. Jerdi qujat túrinde sýarmaly jerge aınaldyryp, qaıta rásimdeý birshama ýaqyt aldy. Qujat ret­telgen soń, 2023 jyly Túr­kııadan 160 mln teńgege jań­byr­latyp sýarýǵa arnalǵan eki qurylǵy ákelip ornatty. Al bıylǵy tamyzdan bastap «Sol­tústik Qazaqstan oblysy tá­jirıbesin tırajdaý» dep atalatyn agroónerkásip kesheni salasyndaǵy jobalarǵa nesıe berý baǵdarlamasy bas­talǵanyn estigen Aıdos «Ulytaý» áleý­mettik-kásip­kerlik korporasııa­syna 400 gek­tar jerdi tamshylatyp sýarý arqyly jemshóp, kókónis ósirýge baǵyttalǵan jobasyn usynyp, nesıelendirýge ótinish berdi. Ol joba júzege asqanda 3 myń tonna jońyshqa, 4 myń tonnaǵa tarta kartop ósirýdi josparlap otyr.

– Qazir memleketimiz aýyldy damytý, aýyl sharýashylyǵyn órkendetý baǵytynda kóptegen baǵdarlama jasap jatyr. Sonyń biri – agroónerkásip ke­sheni salasyndaǵy jobalarǵa nesıe berý. Nesıe óte tıimdi. Nege deısiz ǵoı, óıtkeni, jyldyq mólsherlemesi 2,5 paıy­z ǵana. Nesıeni 10 jylǵa alýǵa bola­dy eken. Sonymen qatar 24 aılyq jeńildikti kezeń de qaras­­tyrylǵan. Sondyqtan qýana otyryp, ótinish berip edim, Uly­­taý oblysynan eń alǵashqy bolyp maquldaý aldym, – degen Aıdos Ismaıl memleket ta­rapy­nan sharýalarǵa kórsetilip jatqan qamqorlyqqa dán rıza ekenin aıtty.

– Ulytaý oblysyna atal­ǵan baǵdarlama aıasynda respýb­lıkalyq bıýdjetten jalpy somasy 3 mlrd teńge qarajat bó­lindi. Oblys ákiminiń sheshimimen jobalardy irikteý jónindegi komıssııa quryldy. Irikteý úderisiniń ashyqtyǵyn, barlyq múddeli tarapyń tartylýyn qamtamasyz etý maqsatynda komıssııa quramyna jergilikti atqarýshy organdardyń, «Ata­meken» óńirlik kásipker­ler palatasynyń ókilderi, más­lıhat depýtattary, bıznes, bu­qaralyq aqparat qu­ralda­rynyń ókilderi kirdi. О́tki­zilgen memlekettik satyp alý qory­tyndylaryna «Ulytaý» ÁKK» AQ baǵdarlamanyń senim bildirgen ókili (agent) bolyp belgilendi. Sharýalar tarapynan ótinishter túse bastady. Komıssııa túsken ótinishterdi qarastyra kele, «Ismaıl A.B.» jeke sharýashylyǵynyń barlyq talapqa sáıkes keletinin anyq­tady. Sóıtip, oblysta agroónerkásip kesheni baǵyty bo­ıynsha alǵashqy nesıe ma­qul­dandy, – deıdi «Ulytaý» áleý­mettik-kásipkerlik korpo­ra­sııasy AQ-nyń basqarma tór­aǵasy Almat Jókebaev.

«Eger jerdi durys óńdep, tehnologııasyn saqtap otyrsa, jańbyrlatyp nemese tamshylatyp sýaratyn bolsa, eginniń ónimdiligi de artady. Osylaı jasap, bir gektar jerden 150 tonna bıdaı jınaǵan jigitti bilemin. Al qazir egindi egip tastaımyz da, jańbyrdyń jaýýyna qaraı ári ketkende 1 tonna jınap júr­miz ǵoı. Endigi jerde biz de aldyńǵy qatarly ozyq ádisterdi qoldana bilýimiz kerek. Soǵan qol jetkizý úshin jeńildikti nesıe berilip jatqany óte durys», degen A.Ismaıldyń sózinen óz isine tııanaqty sharýa ekeni baıqalady. Ol utymdy nesıege qol jetkizdi. Sharýalarymyz shıraq, usy­nar nesıemiz utymdy bolsa, aýyl sharýashylyǵynyń el ekonomıkasyndaǵy úlesi artyp, aýyldyń jaǵdaıy da túzele túseri haq.

Ulytaý oblysy