Foto: pixabay.com
Baıqaý úshinshi jyl qatarynan uıymdastyrylyp keledi, oǵan mektep muǵalimderi de, kolledjder men joǵary oqý oryndarynyń oqytýshylary da qatysa alady.
Atalǵan bastama el pedagogterine platforma aýdıtorııasymen óz tájirıbelerin bólisýge múmkindik beredi. О́tken jyldardaǵy baıqaý jeńimpazdary Botagóz Omarova, Igor Gnoev, Haıdar Myrzahmetov óz beınerolıkteri arqyly mıllıondaǵan laık jınap, áleýmettik jeli qoldanýshylarynyń yqylasyna bólengen edi.
«Baıqaý arqyly men bilim berý mazmunyn qurýdyń jańa tásilderin tabýdy jáne óz bilimimdi bólisýdi úırendim. Bul maǵan dástúrli oqytý sheńberinen shyǵyp, oqýshylarǵa kúrdeli taqyryptardy túsinikti jáne qyzyqty jetkizýdiń jolyn tabýǵa múmkindik berdi. Oqýshylarymnyń fızıkany talqylap, óz oılarymen bólisip, tipti eksperıment úshin jańa ıdeıalar oılap taýyp jatqanyn kórý men úshin erekshe qýanysh boldy», deıdi 2023 jylǵy baıqaýdyń jeńimpazy, fızıka pániniń muǵalimi Haıdar Myrzahmetov.
Baıqaýǵa TikTok-ta tanymdyq kontent jasaıtyn nemese ony bastaǵysy keletin mektep muǵalimderi men kolledjder, joǵary oqý oryndarynyń oqytýshylary qatysady. Qatysýshylar 4 qarasha - 3 jeltoqsan aralyǵynda platformada óz páni boıynsha qysqa tanymdyq beınerolıkter jarııalaýy qajet. Rolıkterdiń uzaqtyǵy keminde 30 sekýnd bolýy kerek. Sondaı-aq #Qazaqstanmuǵalimderi heshteginiń kórsetilýi mańyzdy.
Bıyl ulttyq baıqaýdyń úsh jeńimpazy bolady. Olar krıterııler jıyntyǵy negizinde, sonyń ishinde laık, qaralym sany, beınerolık sapasy jáne oqytylatyn pánge sáıkestigi negizinde baǵalanady.
Baıqaý jeńimpazdary iPhone 16 Pro smartfondaryna ıe bolady, bul olarǵa odan da jaqsy beınekontent jasaýǵa kómektesedi.
