Jaldamaly páterlerdi jetim balalar, ardagerler, I, II toptaǵy múgedekter, jalǵyzilikti, kópbalaly otbasylardyń músheleri, zeınetkerler men múgedek balalardy tárbıelep otyrǵan ata-analar aldy. Almatynyń kommýnaldyq ınfraqurylymdy damytý basqarmasy basshysynyń orynbasary Ǵalymjan Ábdishúkiruly qonystoı jasap jatqan turǵyndardyń qýanyshyna ortaqtasyp, jańa turǵyndarǵa tehnıkalyq máselelerdi egjeı-tegjeı túsindirdi.
Jaldamaly páterge kirgen Zýlfıra Halıýlova: «Jańa úıden páter alǵanyma qýanyshtymyn. Baspanany 2013 jyldan beri kúttim. Buǵan deıin jekemenshik sektorda úı jaldap turatynmyn. Úı alýǵa múmkindik beretin qoldanystaǵy memlekettik baǵdarlamalarǵa óte rızamyn», deıdi.
Bıylǵy jyldyń alǵashqy alty aıynda Almatynyń Naýryzbaı, Medeý aýdandarynda 1080 otbasy jaldamaly turǵyn úı aldy. Qarashanyń alǵashqy dúısenbisinde berilgen 2000 páterdiń 400-i jetim balalarǵa, 250-i erekshe kútimdi qajet etetin jandardy baǵyp-kútip, múgedek balalardy tárbıelep otyrǵan adamdarǵa, 1350-i ardagerlerge, kópbalaly, jalǵyzilikti otbasylarǵa buıyrdy. Oǵan qosa bıyl jumys isteıtin almatylyq jastarǵa 2100 jaldamaly páter berilgenin atap ótý kerek. Jumys isteıtin jastarǵa arnalǵan satyp alý quqyǵynsyz jaldamaly turǵyn úı baǵdarlamasy jastardy qoldaýǵa, jeke baspana satyp alýǵa yntalandyrýǵa baǵyttalǵan.
Jumys isteıtin jastarǵa arnalǵan jaldaý shartynda aı saıynǵy tólem mólsheri 7-den 15 myń teńgege deıin belgilengen, satyp alý quqyǵy men jaldaý merzimin uzartý múmkindigi qarastyrylmaǵan. Buǵan qosa, jumys isteıtin jastarǵa arnalǵan jaldamaly turǵyn úıdi jaldaýshylar úsh jyl ishinde keıinnen ekinshi deńgeıli bankterden ıpoteka arqyly baspana satyp alýǵa depozıtke qarajat jınaýǵa mindetti.
Sonymen Almatyda muqtaj azamattar turǵyn úımen qalaı qamtamasyz etiledi degen saýalǵa keńirek toqtalatyn bolsaq, jyl basynan beri qalada 2 726 kezekte turǵan azamat kommýnaldyq turǵyn úımen qamtamasyz etilgen. 2024 jylǵy 1 qyrkúıektegi jaǵdaı boıynsha turǵyn úı kezeginde 43 448 adam tur. Olardyń ishinde: 2 330 – jetim bala, 7 546 – kópbalaly otbasy, 18 468 – halyqtyń áleýmettik osal toptary (HÁOT), 15 104 – bıýdjettik uıym qyzmetkeri. Qarasha aıynda bul tizim 920 adamǵa kemidi.
Bıylǵy 8 aıda 2 726 azamat turǵyn úımen qamtamasyz etildi, onyń ishinde: 1 080 – kezekte turǵandarǵa arnalǵan kommýnaldyq turǵyn úı qorynan jaldamaly turǵyn úı, 1 348 – jumys isteıtin jastarǵa satyp alý quqyǵynsyz jaldamaly turǵyn úı, 226 – 2% jáne 5% jeńildetilgen nesıe baǵdarlamalary, 72 – «Almaty jastary» baǵdarlamasy arqyly turǵyn úı alǵandar. Sonymen qatar 169,3 mln teńgege 148 turǵyn úı sertıfıkaty berildi.
Sondaı-aq qazan aıynyń sońyna qaraı Almatyda Memleket basshysynyń tapsyrmasymen júzege asqan «Naýryz» jańa turǵyn úı baǵdarlamasy aıasynda turǵyn úı sertıfıkatyn alýǵa ótinish qabyldaý bastaldy. Osyǵan oraı Almaty qalasy máslıhatynyń sheshimimen bastapqy jarnanyń bir bóligin jabýǵa turǵyn úı sertıfıkatyn berýge qarajat bólindi. Sertıfıkat mólsheri 1,5 mln teńgege deıin, ol óteýsiz ári qaıtarymsyz beriledi. Jańa erejege sáıkes sertıfıkat alýǵa otbasynyń ortasha tabysyn rastaý qajet, ol otbasynyń árbir múshesine osy qarjy jylyna belgilengen eń tómengi kúnkóris deńgeıiniń 3,1 eselengen kórsetkishinen (134 561,7 teńge) aspaýǵa tıis. Buǵan deıin turǵyn úı sertıfıkaty tek «Baqytty otbasy», «Shańyraq» baǵdarlamalary aıasynda beriletin, al jańa ózgeris turǵyn úıge muqtaj azamattardy qoldaý múmkindigin keńeıtti.
ALMATY
