Bas prokýror – asa bedeldi qyzmet

Basqalar úshin qalaı ekenin kim bilsin, al qyrǵyz aǵaıyndar úshin dál solaı. Sońǵy bir aı kóleminde eldiń bas prokýroryn almastyrý eldegi úlken saıası oqıǵaǵa aınalǵandaı boldy. Bul eldiń saıası ómirine zer salyp júretin adam Qyrǵyzstannyń bas prokýrory Aıda Salıanovanyń atyn talaı estigen. Ol óziniń qaǵı­datshyldyǵymen, keıde artyq­taý kórinetin qataldyǵymen erek­­shelenetin. Qandaı qyzmet at­qarǵanyna qaramaı, jemqor­lyqqa qatysy barlarǵa qyrǵıdaı tıdi. Sondyqtan da odan kóp adam qaımyǵatyn. Mine, sol Salıanova qyzmetinen ketetin bolypty degen sóz ótken jyldyń aıaǵynda shyǵyp, oǵan el basshylyǵy da túsinikteme berýge májbúr bolǵan. Basshylyq degende, prezıdent Atambaevtyń ózi 27 jeltoqsanda ony ejiktep túsindirdi. Salıanovanyń bul jumystan ketýi úshin birneshe ret ótinish bergenin, biraq ázirge ketpeıtinin, tek demalysqa shyǵa­tynyn aıtqan. Onyń jumy­syna joǵary baǵa berip, tipti, onyń «quqyqtyq memleketti jáne demokratııalyq qoǵamdy nyǵaı­týǵa qosqan úlesi úshin «Manas» ordenimen marapattaǵan da. Al úkimet basshysy Jomart Otarbaevtyń pikiri de joǵary: «Men jeke ózim Salıanovanyń jumysynda qalǵanyn qalar edim. Mundaı adamnan aıyrylýǵa bolmaıdy. Ol qoǵamda úlken bedelge ıe», degen. Arada bir aı ótkende Salıanova jumysynan ketetin boldy. Onyń ótinishin prezıdent Jogorgý Kenesh­ke usynyp, 57 depýtat óti­­nish­ti qanaǵattandyrýǵa, al 18 depýtat oǵan qarsy daýys ber­di. Másele parlamentte qaralyp jatqanda, onyń mańynda shaǵyn mıtıng te ótipti. «Aıda Salıanova, halyq senimen birge!», «Biz Salıanovanyń ketýine qarsy­myz!», «Bılik Salıanovanyń ket­kenine jaýap beredi!» degen plakattar paıda bolypty. Mıtıng­te sóılegenderdiń biri ony qyr­ǵyz­dyń el bılegen qaıratker qyzy Qurmanjan datqamen de teńestirgen. Qalaı degende de, osynyń ózi eldiń bas prokýrorynyń ketýiniń arǵy jaǵynda úlken kúres bolǵanyn ańǵartady. Bireýler ony ketirýge múddeli bolǵan, ekinshileriniń qaldyrǵysy kelgen. Bas prokýrordyń ketýi týraly áńgimege qosarlana ol keter bolsa, ornyna kim bolady degen áńgime de órshidi. Talaı adamnyń aty ataldy. Sirá, bul qyzmetke qyzyǵýshylar kóp bolǵanǵa uqsaıdy jáne oǵan jurtshylyq aıtarlyqtaı mán bergen. Prezıdent Atambaev kópshilik kútpegen adamdy usyndy. Prezı­dent apparatynyń sot reformalary men zańdylyqty júzege asyrý bóliminiń meńgerýshisi Indıra Joldybaeva qadaǵalaý organynyń basshysy bolyp shyǵa keldi. Bul elde bireý basshy qyzmetke kelse, qoldaýshysy kim eken, kimniń týysy degen suraq qoıylady. 32 jastaǵy bas prokýror kons­tıtýsııalyq sottyń burynǵy tóraıymy Sholpan Baekovanyń jáne burynǵy premer-mınıstr Aaly Karashovtyń týysqany ekeni endi belgili boldy. Jurt odan da buryn Joldybaevanyń Aıda Salıanova men joǵarǵy sot tóraıymy Ferýza Jamashevamen jaqyn qurbylar bolǵanyna erekshe mán berip otyr. Qyrǵyzstanda áıel azamat­tardyń da belsendiligi joǵary. Saıası ómirde kózge túsip júrgender barshylyq. Bul rette aldymen prezıdent bolǵan Roza Otynbaeva oıǵa oralady. Salıanova týraly joǵaryda aıttyq. Endi saıası arenaǵa taǵy bir qaıratker shyqty. Ol – Indıra Joldybaeva.