Chempıonat Qaraǵandy qalasynyń Prıshahtınsk bóliginde ornalasqan №33 mektepte ótti. Qaladaǵy 40 mektepten qatysqan 74 komanda 8 sanat boıynsha baq synasty. Olardyń robottary «Qyz qýý», «Asyq atý», «Kókpar», «Jamby atý», «Báıge», «Teńge alý», «Hantalapaı», «Arqan tartý» oıyndarynda básekege tústi. Munymen qosa, ulttyq salt-dástúrdi dáripteıtin sheberlik synyptary ótti. Baldyrǵandardyń rýhty fleshmoby da kópshiliktiń kóńilinen shyqty.
– Uly dala qundylyqtary bizdiń qoǵamdy biriktiredi. Bul jarys qazaq mádenıeti men dástúrin zamanaýı tehnologııalarymen ushtastyryp otyr. Oqýshylardyń tanymyn keńeıtedi. Qaraǵandy qalasynyń mektepterinde tehnıkaǵa beıim oqýshylar úshin barlyq jaǵdaı jasalǵan. Bilim ordalarynda robottehnıka kabınetteri bar. Jabdyqtar jańartylyp jatyr. Bolashaq ınjenerlerge arnalǵan kóptegen úıirme, Steam zerthanalary qosymsha bilim deńgeıinde jumys isteıdi, – deıdi qalalyq bilim bóliminiń basshysy Esentaı Áshim.
9-dan 16 jasqa deıingi oqýshylar robottardy jınaý jáne baǵdarlamalaý daǵdylaryn kórsetti.
– Men robottehnıkamen aınalysqanyma 2 jyl boldy. Kókpar týraly mol málimet jınadym. Biraq munda birinshi barlyq erekshelikti túsinip alý kerek. Aldymen Robot shabandozdy jyldam jınap, sodan keıin ony smartfondaǵy «Bluetooth» arqyly saýatty basqarý qajet, – dep bólisti №33 mektep-bóbekjaı kesheniniń 6-synyp oqýshysy Iаroslav Zemlıanskıı.
Jarys uıymdastyrýshylardyń biri Maǵjan Jumabaev atyndaǵy gımnazııanyń robottehnıka pániniń oqytýshysy Ádilbek Berdihodjaev chempıonattyń aldynda avtorlyq erejeler aldyn ala jazylyp, arnaıy oıyn alańdary jasaqtalǵanyn aıtady.
– «Kókpar» sanaty úshin elektrondy tablo jasaldy. Munda naǵyz oıyn atmosferasy seziledi. Iаǵnı onlaın rejiminde barlyq qatysýshy men jankúıer jarysqa kýá bola alady. «Hantalapaı» jańa sanaty: robot ártúrli jerlerde shashyrańqy asyqtardy jınaýy kerek. Tapsyrma ońaı emes – obektiniń qaı jerde ekenin esepteýge tıis. Qajetti syzyqty joǵaltpaý da mańyzdy, – deıdi Á.Berdihodjaev. Uıymdastyrýshy munymen qosa ulttyq naqyshtaǵy robottehnıka chempıonatynyń ekinshi márte ótkenin atap ótti.
Aldaǵy ýaqytta da dástúrli túrde, respýblıkalyq, tipti halyqaralyq deńgeıde ótkizgisi keletinin jetkizdi. Buǵan da qomaqty qoldaý qajettigin de jasyrmady.
Jarys jeńimpazdary kýbok, medaldarmen marapattaldy. «Alihanrobotics» onlaın ortalyǵynda tegin oqý múmkindigin de syılyq etip tabystady. «Uly dala oıyndarynyń» absolıýtti chempıony ataǵyn Maǵjan Jumabaev atyndaǵy gımnazııanyń komandasy jeńip aldy.
Qaraǵandy oblysy
