OAО́EY baǵdarlamasy – Azııa damý bankiniń bastamasy, jetekshi halyqaralyq qarjy uıymdarymen seriktestikte júzege asyrylady. Konferensııaǵa Azııa damý bankiniń prezıdenti Masasýgý Asakava, OAО́EY ınstıtýtynyń dırektory Kabır Djýrazoda, Eýropalyq komıssııanyń Taıaý Shyǵys, Azııa jáne Tynyq muhıty boıynsha dırektory Peterıs Ýstýbs, Halyqaralyq valıýta qorynyń, Dúnıejúzilik banktiń, Islam damý bankiniń jáne basqa da qarjy uıymdarynyń ókilderi, sondaı-aq Ońtústik Koreıa, Japonııa, О́zbekstan, Qyrǵyzstan, Ázerbaıjan, Grýzııa, Mońǵolııa, Pákistan, Tájikstan, Túrikmenstan úkimettik delegasııalary qatysty.
Memleketterdiń ekonomıkalyq jáne qarjylyq turaqtylyq, ınfraqurylymdy damytý, saýda, energetıka, sý resýrstary, dekarbonızasııa jáne basqa da salalardaǵy ózara is-qımyly talqylandy. Premer-mınıstr Oljas Bektenov baǵdarlamanyń Ortalyq Azııa óńiri úshin ózektiligin atap ótti. 20 jyldan astam ýaqyt ishinde óńirge shamamen 51 mlrd dollar ınvestısııa salynsa, onyń 9 mlrd dollardan astamy Qazaqstandaǵy jobalarǵa baǵyttalǵan.
«Biz ortaq maqsattarǵa jetý úshin halyqaralyq qarjy uıymdarymen jáne OAО́EY-ǵa qatysýshy eldermen tyǵyz yntymaqtastyqta jumys isteýdi jalǵastyramyz. Biz tereń óńdeýge jáne qaıta óńdelgen ónim úlesin arttyrýǵa, eksport qurylymyn belsendi túrde ózgertýge jáne onyń kólemin ulǵaıtýǵa basa nazar aýdara otyryp, agroónerkásip keshenin damytýǵa baǵyttalǵanbyz. Sondaı-aq biz Ortalyq Azııa memleketteriniń kólik qatynasy men energetıkalyq turaqtylyǵyn qamtamasyz etetin aýqymdy ınfraqurylymdyq jobalardy iske asyrýǵa múddelimiz. О́ńir elderi men halyqaralyq qarjy uıymdaryn birlesken jobalardy júzege asyrý úshin kúsh biriktirýge shaqyramyn», dep atap ótti O.Bektenov.
О́z kezeginde Azııa damý bankiniń prezıdenti Masasýgý Asakava OAО́EY basym baǵyttary qatarynda klımattyń ózgerýine qarsy kúreste sheshýshi is-qımyldar qabyldaý, erte eskertý júıelerimen turaqty ınfraqurylym qurý, sondaı-aq sıfrlyq transformasııany damytý jáne ınnovasııalar engizý turǵanyn basa aıtty. Konferensııaǵa qatysýshylar adamı kapıtaldy damytýǵa jáne halyqtyń turmys sapasyn jaqsartýǵa baǵyttalǵan bastamalarǵa nazar aýdardy.
Jıyn qorytyndysy boıynsha OAО́EY Klımat jáne ornyqty damý jobalaryn daıyndaý qory týraly kelisimge qol qoıyldy.
