Qoǵam • 11 Qarasha, 2024

Qazaqstanda ınternet qoldanýshylardyń úlesi 93%-ǵa jetti

190 ret

kórsetildi

1 mın

oqý úshin

Sıfrlandyrý jáne aqparattyq tehnologııalar kúnine oraı Úkimettiń baspasóz qyzmeti Qazaqstannyń osy saladaǵy negizgi jetistikteri týraly aıtty, dep habarlaıdy Egemen.kz.

Qyrmyzy JUMAǴALIQYZY

Qazaqstanda ınternet qoldanýshylardyń úlesi 93%-ǵa jetti

Foto: Ashyq derekkóz

BUU deregi boıynsha, 2024 jyly Qazaqstan álemniń 193 eliniń ishinde telekommýnıkasııa ınfraqurylymy ındeksinde 42-shi oryndy ıelengen. Eldegi ınternet-paıdalanýshylardyń úlesi 93%-ǵa jetti.

Sonymen qatar BUU Halyqaralyq elektr baılanysy odaǵynyń Jahandyq kıberqaýipsizdik ındeksine sáıkes, bıyl paıdalanýshylardyń derbes derekterin qorǵaý deńgeıi boıynsha Qazaqstan TMD elderi arasynda birinshi bolǵanyn atap ótti.

Aıta keteıik, sońǵy 10 jylda memlekettik qyzmetter sany 2 eseden astam ósken.

2024 jyldyń birinshi jartyjyldyǵynda arnaıy qosymshalar men servıster arqyly paıdalanýshylarǵa 33 mln qyzmet kórsetilgen. Tek osy jyldyń qazan aıynda QR-kodtar arqyly 8 mln qol qoıylsa, Digital ID júıesi arqyly 18 mln sáıkestendirý júrgizilgen.