Kezekti kongress qatysýshylar sany jaǵynan rekordyq kórsetkishke jetti, deıdi sarapshylar. 23 elden kelgen 700-den astam delegat konferensııa zalynan tabylyp, 5 myńnan astam adam onlaın-rejımde qatysty. 19 eldiń sarapshylary baıandama jasap, osy salanyń beldi mamandary Qazaqstandaǵy áriptesterimen birge bedeýlikti emdeý ádisteri men qoljetimdiligin talqylap, ozyq tájirıbeler men sońǵy ǵylymı jetistikterdi ortaǵa saldy.
Kongress jumysyna elimizdiń jetekshi ǵylymı jáne klınıkalyq ortalyqtarynyń basshylary, akýsher-gınekolog dárigerler, EQU ortalyqtarynyń ókilderi, bedeýlikti emdeıtin andrologtar, endokrınologtar, embrıologtar, hırýrgtar, genetıkter men molekýlalyq bıologtar – Qazaqstan, Grýzııa, Reseı, Belarýs, О́zbekstan, Qyrǵyzstannyń, AQSh, Serbııa, Izraıl, Italııa, Germanııa, Túrkııa men Rýmynııanyń jetekshi mamandary qatysty.
Is-sharany Qazaqstan Reprodýktıvti medısına qaýymdastyǵy Qazaqstan Respýblıkasynyń Densaýlyq saqtaý mınıstrliginiń qoldaýymen uıymdastyrdy. Qazaqstan Reprodýktıvti medısına qaýymdastyǵy (KARM) 2008 jyly 2 qazanda TMD men Eýropa elderindegi qaýymdastyqtarynyń úlgisimen qurylǵan edi. Akýsher-gınekologtar, andrologtar, embrıologtar, genetıkter, psıhologtar men bedeýlik máselesimen aınalysatyn mamandardy biriktirip otyrǵan KARM – Adam reprodýksııasy jónindegi Eýropalyq konsorsıýmnyń qaýymdastyrylǵan múshesi.
Bıylǵy Kongress aıasynda QRT embrıologııasynyń ózekti máseleleri, akýsherlik jáne gınekologııa boıynsha Qazaqstan, Izraıl, Portýgalııa, Italııa, Reseı, Belarýs, Japonııa, Grýzııa jáne Úndistan mamandarynyń qatysýymen sheberlik synyptary ótkizildi.
Beleń alyp turǵan bedeýlik máselesin sheshý elimizdegi demografııalyq jaǵdaıyn durystap, túrli sebeptermen bala súıe almaı júrgen juptardyń keleshegine ıgi yqpal etedi.
Al zamanaýı dıagnostıka ádisteri bedeýliktiń negizgi sebepterin naqty anyqtap, tıimdi emdom júrgizýge jol ashyp otyr. Bedeýliktiń shamamen 40%-y erlerdiń reprodýktıvtik júıesiniń patologııasymen baılanysty bolsa, 30%-ynda aralas bedeýlik (erler jáne áıelder bedeýligi) baıqalady.
KARM prezıdenti, QR UǴA akademıgi, medısına ǵylymdarynyń doktory Vıacheslav Lokshınniń aıtýynsha, erler men áıelderdiń reprodýktıvtik densaýlyq máselesi burynǵydan da ózekti bola túsken. Professor V.Lokshın Qazaqstanda bedeýlik pen reprodýktıvtik júıeniń basqa da keselderi jıilep, tómendemeı otyrǵanyn aıtady.
«Alǵashqy jyldary túsik jasatý sany aıtarlyqtaı tómendegenimen, qazirgi tańda bul kórsetkish turaqty jáne kópshilik kontrasepsııany asa tıisti qoldana bermeıdi. Sondyqtan bedeýlik deńgeıi 16-17% deńgeıinde saqtalyp tur. Erler bedeýligi, áıelder bedeýliginiń sebepteri arasynda jynystyq jolmen beriletin ınfeksııalardan bolatyn qabyný aýrýlary, túsikter men basqa da faktorlar bar», deıdi Vıacheslav Lokshın.
Professor reprodýktıvtik júıeniń buzylýyn boldyrmaý máseleleriniń mańyzdylyǵyn atap ótti. Jynystyq ádepti saqtaý, erte dıagnoz qoıý, otbasyn durys josparlaý, antıvırýs gormonyn tekserý qajettigin alǵa tartyp otyr.
