Sheberlik saǵatynda avtor birneshe kartınasyn tanystyrdy. Sondaı-aq ortada Bozoq qalashyǵyna arnalǵan kompozısııasymen jumys istedi. Ár detaldiń ornyn kórsetip, salyný tehnıkasymen bólisti. Tolyq kompozısııada kórine bermeıtin sýretshilik aıla-tásilderin aıtty.
«Mundaı sheberlik saǵattaryn uıymdastyrý osy saladaǵy mamandarǵa, bolashaq sýretshilerge óte paıdaly. Beıneleý ónerindegi eń birinshi qundylyq – kompozısııa. Iаǵnı úılestirý, bir element pen bir elementti uıqastyrý. Kompozıtorlar bir nota men bir notany úılestirip, tańǵajaıyp týyndy shyǵaryp jatady. Sol sııaqty beıneleý ónerinde de kompozısııalardyń ózara úndesip, túrli detaldar ishinara jymdasyp tursa ǵana naǵyz kórkem kartına týady. Biz kásibı mamandardy daıyndap jatqannan keıin qanshama jyldyq tájirıbemmen bólisý, sýretshilik syrlarymdy ashyp, obraz jasaýdaǵy qupııalarymmen bólisýdi ustazdyq paryz sanaımyn. О́ner adamdarynyń maqsatynyń biri – ultqa qyzmet. Abaıdyń «Ustazdyq etken jalyqpas, úıretýden balaǵa» degenindeı, bul sheberlik saǵaty shákirtterime jasaǵan esebim men tájirıbem. Stýdentter shyǵarmashylyq kóńil kúıden shyǵa almaı, úlken tolqynyspen tarap jatyr», deıdi Sembiǵalı Smaǵulov.
Aıta keteıik, sýretshi bıyldyqqa mundaı sheberlik saǵattaryn úshinshi ret ótkizip otyr. Buǵan deıin Atyraýda, Astanada L.N.Gýmılev ýnıversıtetinde bolyp, shyǵarmashylyq dáris oqyǵan.
Sheberlik saǵatynyń sońynda qatysýshylar túrli suraqtar qoıyp, pikir almastyrdy. Kompozısııadaǵy ár syzyqtyń, ár núkteniń mán-mańyzyn, basqa detaldarmen baılanysyn talqylady.
«Al mynaý ortada jumys istegen kompozısııany Bozoq qalasyna arnadym. Jalpy, bul qalashyqtyń tarıhı mańyzy zor. Sol zamannyń keskin-kelbetine boılap, kompozısııalyq úılesimde berý ózime qyzyq boldy. Kóp ýaqyttan beri tolǵanyp júrmin. Bul jumysym jaryqqa shyqqan joq, búgin arnaıy eldiń aldyna usynyp otyrmyn. Adam eshqashan tolyq kemeldenbeıdi ǵoı. Degenmen alpystyń asýyna kelip jatqan tusta qanshama jyldyq tájirıbemniń esebi syndy boldy», deıdi sýretshi.
