Sýretti túsirgen – avtor
Resmı jıynda Qytaıdan kelgen delegasııany oblystyq kásipkerlik jáne ındýstrııalyq-ınnovasııalyq damý basqarmasy týrızmdi damytý bóliminiń basshysy Ardaq Mádıev shyǵystaǵy týrızm áleýetimen tanystyrdy.
«Memleket basshylarynyń yntymaqtastyǵy, yqpaldastyǵy kópke úlgi. Biz de kórshiles aýmaqta tyǵyz qarym-qatynas ornatyp, týrızm salasyn damytýymyz kerek. О́skemenge jetkenshe óńirdiń ásem tabıǵatyna tánti bolǵan shyǵarsyzdar. Taýly, sýly óńirdiń kóp bóligi – Shyǵys Qazaqstanda. Qytaıda týrızm jaqsy damyǵanyn bilemiz. Statıstıkalyq derekterge sensek, jylyna 150 mıllıonnan astam qytaı saıahatshysy álemdi aralaıdy eken. Solardyń bir bóligin elimizge tartsaq degen oıymyz bar. Osy maqsatta eksklıýzıvti týrlar, toptyq týrızmdi júıeli uıymdastyrýdy josparlap otyrmyz. Jalpy, shyǵys óńiri jaz maýsymynda bir mezgilde 20 myń týrısti qabyldaı alady», dedi A.Mádıev.
Oblysta salynyp jatqan joldar, Kúrshimniń kópiri saıahatshylardyń ári-beri qatynaýyna qolaıly. О́ńir basshylyǵy Almatynyń týrıstik kompanııalarymen de jumys júrgizip jatyr. Shyǵysqa kelgen týrıster Altaıdy aralap shyǵyp, Alataý asyp jatsa, qandaı ǵanıbet. Sol jaqtan Qytaıǵa ushyp ketý de ońaı. Jıyn barysynda keler jyl Qytaıda «Qazaqstan jyly» bolyp jarııalanatyny da sóz boldy. Ol da – eki el arasyndaǵy yntymaqtastyqtyń artyp kele jatqandyǵynyń taǵy bir jarqyn dáleli.
Kúzdiń qulpyryp turǵan shaǵynda arǵy betten at arytyp jetken qytaılyq týroperatorlar Altaıdy tórt kún aralaǵanda tamyljyǵan tabıǵatqa tamsanýmen, tańdanýmen boldy. Shyndyǵynda, shyǵystyń týrıst tartýǵa áleýeti zor. Tek qana qyzmet kórsetý servısin jandandyrý qajet. Sonda tabıǵat aıasyna serýendeýden bastap, tanymdyq týrızmge deıin kóptep uıymdastyrýǵa bolady.
«Elimizde medısınalyq týrızm de bar. Atap aıtsaq, О́skemendegi onkologııalyq ortalyqtyń bilikti de tájirıbeli mamandary san salaly qyzmet túrlerin kórsetedi. Sonymen qatar jazdyń aptap ystyǵynda jaǵajaılarda demalý múmkindigi de jan-jaqty qarastyrylǵan. Kúre joldar jóndelip jatyr, jol boıyndaǵy ınfraqurylymǵa da basa nazar aýdaryp otyrmyz», dep sózin tolyqtyrdy A.Mádıev.
Erekshe aıta keterligi, Shyǵys Qazaqstan óńirinde qysqy týrızm, onyń ishinde taý shańǵysy jaqsy damyǵan. Eger qytaı saıahatshysy qys mezgilin, qarly maýsymnyń qyzyqtaryn tamashalaǵysy kelse, alystan izdep kerek emes, irgedegi, О́skemende, Rıdderde shańǵy teýip, serýendep qaıtýyna ábden bolady. Dóńgelek ústel basynda Qytaı taraby birlese jumys isteýge ázir ekendikterin jetkizdi.
«Vızasyz rejimniń múmkindigin barynsha paıdalanyp jatyrmyz. Nátıjesi de kórine bastady. Bul jolǵy aqparattyq týrdyń maqsaty – Shyǵys Qazaqstandaǵy týrızm salasyna serpin berý. Delegasııa quramynda týrıstik operatorlar bar. Olar sizdermen jumys isteýge nıetti. Máselen, Qytaıdyń Qanasyna baratyn týrısterdi shyǵysqa tartýǵa bolady. О́skemen – tarıhı qala. Ol da bizge unaıdy», dedi Shyńjań-Altaı týrıstik kompanııasynyń ókili Go Shaoszıan.
Qanas demekshi, Shyǵys Qazaqstanda Qanastaı kóldiń birnesheýi bar: Rahman, Buqtyrma, Marqakól, Qarakól syndy taý basyna móldireı bitken aıdyndar az emes. Alaıda týrızmdi damytamyz dep júrip, tabıǵatqa zııan tıgizip almaýdy da basty nazarda ustaý qajet.
«Shyǵysta shaǵyn týrızmdi ǵana emes, Qanas kólindegideı keń aýqymdy týrızmdi de qolǵa alýymyz kerek. Máselen, Marqakól kólemi jaǵynan Qanastan áldeqaıda úlken. Tabıǵaty da kórkem. Sondyqtan Qanas pen Katonqaraǵaı, Marqakól jóninde bólek, arnaıy jospar jasalýy kerek. Qanastan Marqakólge qaraı týrıstik qaqpa ashýymyz kerek. Eger osy marshrýtty jolǵa qoısaq, Qanasqa qyzyǵýshylyq eselene túsedi», deıdi týrızm salasynyń ardageri Myrzahan Shákenov.
Bilikti maman sondaı-aq Ulan aýdanynyń aýmaǵynda jatqan Sibe kólderiniń mańyndaǵy ınfraqurylymdy damytý kerektigin aıtty. Tabıǵatty saqtaı otyryp týrızmdi dóńgeletsek, jergilikti halyqtyń da turmys deńgeıi kóterilip, áleýmettik ál-aýqaty áldeqaıda artar edi.
Shyǵys Qazaqstan oblysy
