Vıtreoretınaldy hırýrgııa – kóz tory men áınek tárizdi dene aýrýlarynyń aýyr túrleri kezindegi otalarymen baılanysty aýyr kesel. Bul dert qazir búkil jahanda kúrt damyp kele jatqan kóz hırýrgııasynyń eń kúrdeli salasymen baılanysty zamanaýı medısınanyń eń joǵary tehnologııalyq baǵyttarynyń biri.
Ásirese, sońǵy 10 jylda elimizde balalar arasynda kóz tory men áınek tárizdi dene kináraty beleń alǵandyqtan, Balalar jedel medısınalyq járdem ortalyǵynyń Kóz mıkrohırýrgııasy bólimshesi negizinen shala týǵan nárestelerdiń retınopatııasy, otbasylyq ekssýdatıvtik vıtreoretınopatııasy syndy, Koats retınıti men kózdiń basqa da aýyr keselderine operasııalar jasaýǵa kóshken.
«Osy oraıda kompanııamyz Qazaqstandaǵy balalar oftalmologııasynyń ozyq qyzmetterin damytýǵa septesyp jatqanyn maqtan tutady. Biz medısınalyq mekemelerdi jabdyqtap, mamandandyrylǵan oftalmologtardy oqyta otyryp, kózdiń kúrdeli patologııasy bar balalardy otanymyzda joǵary sapaly medısınalyq kómekpen qamtamasyz etýge kómektesemiz. Bul bastama bizdiń medısınalyq kómekke qoljetimdilikti jaqsarta otyryp, otandastarymyzdy emdeý sapasyn jaqsartýǵa beıildiligimizdi kórsetedi», deıdi «Shevron» kompanııasynyń Eýrazııalyq bólimshesiniń korporatıvtik baılanystar jónindegi dırektory Erkin Zikibaev.
Qalaı desek te, sońǵy jyldary Qazaqstanda balalardyń vıtreoretınaldy jáne lazerlik hırýrgııasy damyp keledi. Qazir osy dertke shaldyqqan balalardyń kóbeıýine baılanysty olarǵa Almatydaǵy kópbeıindi Balalar shuǵyl medısınalyq járdem ortalyǵynyń bazasynda ota jasalynyp jatyr. Munda 2 aılyq nárestelerden bastap, odan da úlkenirek sábılerge Delıde balalar vıtreoretınaldy hırýrgııasy boıynsha álemge tanymal maman professor Nıhıl Paldan dáris alǵan oftalmolog-hırýrgter brıgadasy qajetti hırýrgııalyq em-dom júrgize alady.
Balalar shuǵyl medısınalyq járdem ortalyǵynda ótken aıtýly oqıǵaǵa oraı, Almaty qalalyq Qoǵamdyq densaýlyq saqtaý basqarmasy basshysynyń mindetin atqarýshy Nazgúl Imanǵalıeva: «Bizdiń basqarma balalar densaýlyǵyn saqtaýda ınnovasııalyq tásilderdi damytý men engizýdi tolyǵymen qoldaıdy. Sondaı-aq biz halyqqa memlekettik medısınalyq ortalyqtarda kórsetiletin ozyq medısınalyq qyzmetterdiń qoljetimdiligin keńeıtýdi qoldaımyz», deıdi.
Oraıy kelip turǵanda, Constellation Vision oftalmologııalyq hırýrgııalyq júıesi kózdiń aldyńǵy jáne artqy bólikteriniń túrli patologııalary kezinde lazerlik ári vıtreoretınaldyq otalardy júrgizýge arnalǵan zamanaýı medısınalyq keshen ekendigin atap ótý kerek. Ol áınek tárizdi dene men tinderdi kesýge, kóz burshaǵyn emýlsııalaýǵa, kóz almasynyń artqy bóligin jaryqtandyryp, qan ketýdi toqtatý úshin dıatermııany qoldanýǵa jáne vıtreoretınaldy otalar jasaý kezinde qajetti basqa da ondaǵan manıpýlıasııalardy júrgizýge múmkindik beredi.
Mańyzdy oqıǵa barysynda AYALA qaıyrymdylyq qorynyń negizin qalaýshy ári prezıdenti Aıdan Súleımenova: «Bıylǵy qańtar-qazan aılarynda elimizdegi 57 bala ata-analarymen birge vıtreoretınaldy ota jasaý úshin shetelderge, Úndistan men Reseıge barýǵa májbúr boldy. Búgin iske asyrylyp otyrǵan jobanyń arqasynda biz ata-analardyń osyndaı otalardy jasatý úshin shetel asyp, qyrýar qarjy shashýyn toqtata alamyz dep oılaımyn. Jáne Qazaqstandaǵy balalar oftalmologııalyq qyzmetin damytýǵa belsendi úles qosyp, osy oraıda «Shevron» kompanııasymen kúsh-jigerimizdi biriktirip, qoldaǵany úshin alǵys aıtamyz», dedi.
ALMATY
