Sýretti túsirgen – avtor
О́skemen – Tarǵyn – Samar baǵytynda bir emes, eki táýlik jol bolmady. Qalyń túsken ylǵaldy qardy arshyp alý aýyr tehnıkaǵa da ońaı soqpady. Byltyr alty metrge jýyq qar túsken Marqakól óńirinde de jaýǵan qardyń saldarynan aýdan ortalyǵynan Tósqaıyńǵa deıingi jol jabyldy. Onyń arǵy jaǵyndaǵy Balyqtybulaq, Shanaǵaty aýyldary jyldaǵydaı baılanyssyz qalǵan. Taýly aımaqta ǵana emes, Sekısovka men Rıdder arasyndaǵy týra jolda da qozǵalys toqtatylǵan. Jalpy, óńirdiń qaı baǵytynda bolmasyn, tirkemesi bar júk kólikteriniń qozǵalysyna shekteý qoıylǵan. Ásirese, О́skemen – Altaı baǵytyndaǵy kúre jolda tirkemesi bar, jartylaı tirkemeli kólikter qystaı qatynaı almaıdy.
Bul jolǵy qarly boran oblystyq tótenshe jaǵdaılar qyzmetkerleri turǵyndarǵa táýlik boıy eskertý jiberip otyrdy. Jol patrýl polısııa qyzmetkerleri qalanyń tórt buryshynda tártiptiń saqtalýyn qatań qadaǵalady. Shekteýge qulaq aspaı, jolǵa shyqqan azamattar jaýapkershilikke tartylatynyn eske saldy.
– Aqtútek borandy kúnderi kúre joldarda polıseıler qaýipsizdikti qamtamasyz etýde baryn salyp, jumys istedi. Ásirese, joldardyń qaýipti ýchaskelerinde patrýldeýdi uıymdastyrdy. Qıyn jaǵdaıǵa tap bolǵan jolaýshylarǵa kómek qoldaryn sozdy. Jol ashylǵan sátte uzyn-sonar kolonnalarǵa polısııa patrýli jol bastady, – deıdi ShQO PD baspasóz hatshysy, polısııa maıory Gúlnur Túsipova.
Polısııanyń jedeldigi men kásibı áreket etýiniń arqasynda kóptegen jolaýshylar oqys jaǵdaılardan aman qalǵany anyq. Áıtpese, jol jıegine kóligin qaldyryp, adasyp ketken azamattar da boldy. 1954 jyly týǵan О́skemen qalasynyń turǵyny qaladan uzaı bere jol boıyndaǵy tóbeni aınala ósken buta, qaraǵan jaqty betke alǵan. Maqsaty ıtmuryn terip almaq bolypty. Borandy kúni joldan shyǵyp ketken ol adasyp, qaıtar izin tappaǵan. Qaýiptiń tónip turǵanyn sezdi me, dereý 112 nómirine habarlasyp, kómek shaqyrypty. Jedel qımyldaǵan qutqarýshylar adasqan azamatty taýyp, kóligine deıin aman-esen jetkizgen.
Osy rette tótenshe jaǵdaılar departamenti mamandary jolǵa shyqpas buryn kún raıyn boljap, jol jaǵdaıyna kóz jetkizip alýdy eskertedi. Qalta telefonǵa kelgen habarlamalarǵa beı-jaı qaraýǵa bolmaıdy. Alys jolǵa shyqqan jaǵdaıda arqan, janarmaı qory, kúrek, qol sham, alǵashqy medısınalyq kómek kórsetý qobdıshasy, jyly kıim, azyq-túlik alýdy umytpaǵan jón. Sondaı-aq jyldamdyq rejimin asa qatań saqtaý qajet. Tótenshe jaǵdaıǵa tap bolsa, 112 nómirine qońyraý shalýǵa keńes beredi.
Shyǵys Qazaqstan oblysy
