Foto: Energetıka mınıstrligi
Vıse-mınıstr Parıj kelisiminiń maqsattaryn oryndaý úshin álemdik ekonomıkany dekarbonızasııalaýdy jedeldetýge jáne parnıktik gazdar shyǵaryndylaryn azaıtýǵa baǵyttalǵan 2050 jylǵa qaraı atom energetıkasyn úsh ese ulǵaıtý jónindegi deklarasııaǵa Qazaqstannyń qosylatynyn jarııalady.
«Qazaqstannyń 2050 jylǵa qaraı atom energııasyn úsh ese ulǵaıtý týraly Deklarasııaǵa qosylýy –turaqty jáne ekologııalyq taza bolashaqqa jasalǵan mańyzdy qadamymyz. Biz energetıkalyq qaýipsizdikti nyǵaıtyp qana qoımaı, ortaq maqsatqa jetý úshin álemdik qoǵamdastyqpen yntymaqtasa otyryp, kómirtegi shyǵaryndylarynyń jahandyq tómendeýine eleýli úles qosýǵa tyrysamyz», dedi Energetıka vıse-mınıstri.
Aıta keteıik, Parıj kelisiminiń alǵashqy jahandyq sholýy aıasynda atom energetıkasy temperatýranyń 1,5°S ósýin shekteý maqsatyna jetýdiń negizgi sheshimderiniń biri retinde tanylǵan.
Búginde deklarasııaǵa 26 memleket qosyldy: Armenııa, Bolgarııa, Kanada, Horvatııa, Chehııa, Fınlıandııa, Fransııa, Gana, Majarstan, Iаmaıka, Ońtústik Koreıa, Moldova, Mońǵolııa, Marokko, Nıderlandy, Polsha, Rýmynııa, Slovakııa, Slovenııa, Shvesııa, Ýkraına, BAÁ, Ulybrıtanııa, Amerıka Qurama Shtattary jáne onyń ishinde Qazaqstan.
Qazaqstannyń atom energetıkasyn úsh ese ulǵaıtý týraly Deklarasııaǵa qosylýy eldiń ornyqty damý maqsattaryna beıildiligin jáne klımattyń ózgerýine qarsy kúreske eleýli úles qosýǵa daıyn ekendigin bildiredi. Qazaqstan atom energetıkasyn 2060 jylǵa qaraı kómirtegi beıtaraptyǵyna qol jetkizýge, taza energııa kózderiniń úlesin ulǵaıtýǵa jáne senimdi energııamen jabdyqtaýdy qamtamasyz etýge múmkindik beretin óziniń bolashaq energııa teńgeriminiń mańyzdy komponentteriniń biri retinde qarastyrady.
Qazaqstan beıbit atomdy damytý jónindegi halyqaralyq bastamalarǵa belsendi qatysýǵa jáne osy saladaǵy jetekshi memlekettermen jáne halyqaralyq uıymdarmen yntymaqtastyqty keńeıtýge nıetti.
