Abaı oblysynyń Jezkent kentindegi mektep-lıseıi oqýshysynyń jobasy ǵaryshtaǵy jerserikter men ǵarysh stansalaryn energııamen qamtamasyz etý máselesin sheshýge baǵyttalǵan. Nuralıdiń ónertabysy eki bólikten turady. Birinshi bóligi – lazer sáýlesin baǵyttaıtyn fokýs júıesi bar ǵarysh kemesi, al ekinshi bóligi – lazer sáýlesin elektr energııasyna aınaldyratyn fotorezıstor ornatylǵan qurylǵy. Lazer sáýlesi fotorezıstorǵa túsip, ony túrlendirgish arqyly elektr energııasyna aınaldyrady. Bul energııa shamyn jaǵýǵa nemese uıaly telefondy qýattaýǵa jetedi.
Jas ónertapqysh qurylǵyny 10 metr qashyqtyqta synap, ony jańbyr, qar, tuman sııaqty túrli aýa raıy jaǵdaıynda synaqtan ótkizgen. Synaq nátıjeleri ónertabystyń turaqty ári senimdi ekenin kórsetti. «Ǵaryshta energııa tapshylyǵy máselesi bar. Jerserikter men ǵarysh kemeleri energııanyń azdyǵynan isten shyǵýy múmkin. Men ǵaryshkerlerge kómek retinde osy qurylǵyny jasadym. Jobany jasaýǵa eki jyldan asa ýaqyt jumsadym, qoljetimdi materıaldardy paıdalanyp, ǵaryshta energııa jetkizý múmkindigin jáne ǵaryshta lazermen energııa jetkizý áldeqaıda tıimdi bolatynyn dáleldedim», deıdi jas ónertapqysh.
2019 jyly Nuralı jobasyn Máskeý fızıka-tehnıkalyq ınstıtýtynyń baıqaýynda tanystyryp, joǵary baǵaǵa ıe bolǵan. Keıinnen qurylǵyǵa qýaty myqty lazer ornatyp, baǵdarlamalyq kodyn jetildire túsken. Jas ónertapqysh jobasyn odan ári damytyp, Baıqońyrda ótetin halyqaralyq baıqaýǵa qatysýdy josparlap otyr. Bolashaqta qurylǵyǵa kún batareıalaryn qosyp, ony turmystyq qajettilikterge, onyń ishinde lazerlik zarıadtaý qurylǵylary arqyly uıaly telefondardy qýattaýǵa qoldanyp kórmek.
