Iá, temirden túıin túıetin sheber bolýǵa qyzyǵatyn jastardyń qatary sırek ekeni ras. Desek te Túrkistan qalasynyń turǵyny Qurbanáli Rasýlov tokar bolýǵa bala kezinen qyzyqqan. Búginde jıyrma jeti jastaǵy jigittiń jumysshy mamandyǵyn tańdap, tokarlyq qyzmet kórsetip kele jatqanyna on jylǵa jýyqtapty.
«Bala kezimnen ákeme kómekshi boldym, qasynan shyqpaıtynmyn. On eki jasymnan bastap turmystyq tehnıkalardy, sý shyǵaratyn motorlardy, basqa da túrli tehnıkalardy jóndeýdi, olarmen jumys isteýdi úırene bastadym. Bertinirek ákem tokarlyq stanok satyp aldy. Sol qondyrǵyda maǵan kóptegen jumysty úıretti. Jalpy, ákem óz biletinin maǵan da erinbeı úıretip, osy bir beınetkesh mamandyqtyń qyr-syryn meńgerýime septigin tıgizdi. Oǵan qosymsha, ınternet keńistigi arqyly da kóp nárseni oqyp-úırendim. On jylǵa jýyqtapty, osy ispen aınalysyp kelemin», deıdi Qurbanáli Ábdimanapuly.
Tokarlyq stanokta metall men basqa da materıaldardy paıdalana otyryp túrli betterdi, búıirlik jazyqtyqtardy óńdep, kesetin, sondaı-aq buranda kesý, burǵylaý syndy kóptegen operasııalardy oryndaıtyn sheber jumysynyń ońaı emestigin aıtady. Suranysqa ıe joǵary deńgeıdegi tokar bolýǵa eń kemi eki-úsh jyldyq tájirıbe kerek eken.
«Kez kelgen óndiriste, qurylysta metall konstrýksııalar, stanoktar, metall bólshekter qoldanylady. Sátti jumys istep, seniń qyzmetińe júgingen adamdardyń suranysyn qanaǵattandyrýda sheberdiń dáldik, uqyptylyq, qara jumysqa tózimdilik sııaqty jeke qasıetteri bolýy kerek. Dáldigińiz matematıka, geometrııamen ushtasady, syzý, fızıkany da bilý mańyzdy. Muny aıtyp otyrǵan sebebim, bilimi taıazdar jumysshy bolady degen teris túsiniktiń bary belgili. Sonymen qatar kez kelgen tokar fızıkalyq turǵyda myqty bolýǵa tıis. О́ıtkeni tańnyń atysynan stanokty mańaılap tize búkpeı jumys isteý ońaı sharýa emes. Stanok jabdyǵy joǵary kerneýde jumys isteıdi, jyldam aınalatyn ystyq metall elementteri kóp. Sondyqtan qaýipsizdikti saqtaý da asa mańyzdy. Ras, qazirgi tańda tokar óte az. Jańa aıtyp ótkenimdeı, jumysy ońaı emes. Sondyqtan da shyǵar bul mamandyqty tańdaıtyndar sırek, sondaı-aq tokarlyqty oqytatyn oqý oryndarynyń joqtyǵyn alǵa tartatyndar da bar. Endi biri jalaqysyn qanaǵat tutpaıdy», deıdi maman jumysshy.
Qurbanáli jumysshy mamandyǵyn tańdaǵanyna ókinbeıtinin aıtady. Jumys isteı júrip, kásiptik kolledjdi támamdaǵan oǵan 3d dızaıneri bolý jóninde usynys ta túsipti. Biraz tapsyrys qabyldap, ony oryndaǵan da. Sonyń arasynda keıbir tapsyrystarǵa baılanysty elektrmontajshy da bolyp istegen. Alaıda kóp uzamaı tokarlyqqa qaıta oralǵan.
«Basqa salaǵa aýysyp kórgenim bolmasa, bul mamandyqty ıgergenime esh ókinbeımin, kerisinshe maqtan tutamyn. Tokardyń jumysy óte jaýapty, kúrdeli. Berilgen tapsyrmalardy syzbalar arqyly dálme-dál etip jasap shyǵarý, úzilissiz jumys istep turǵan stanoktyń shýyly, segiz saǵat boıy aıaqta turý sııaqty ózindik qıyndyqtary da jeterlik. Biraq tapsyrys berýshiniń kóńilinen shyǵyp, kúndelikti óndiriske qajetti buıym jasap shyǵarǵanyńda bar qıyndyqty umytyp, óz kásibińnen lázzat alasyń. Negizi jastardyń, zamandastarymnyń oqyp-úırengeni jaqsy. Bilimin rastaıtyn dıplomy bolsa, jumysqa kirýi de ońaı bolady. Osy oraıda Prezıdentimizdiń 2025 jyldy Jumysshy mamandyqtary jyly dep jarııalaýy erteńgi kúnge senimdi nyǵaıtady. Iаǵnı búginde tapshy bolyp otyrǵan jumysshy mamandyqty tańdaýshylar qatary artady. Árıne, sheberlerden úırengender de jaman bolmaıdy. Jas mamandarǵa teorııany kóbirek zerdelep, úderistiń mánin tereń bilý óte mańyzdy. Qazir álem kún saıyn ózgerip, damý ústinde. Túrli kýrstarǵa qatysyp, tokarlyq istiń jańalyqtary týraly oqyp-úırenýge tyryssa, úlken jetistikterge jol ashylady. Jalpy, eńbek naryǵynda tokar mamandary joǵary suranysqa ıe», deıdi jumysshy.
Elimizde kásiporyndardyń, zaýyt-fabrıkalardyń kóptep ashylǵanyn qalaıtyn Q.Rasýlovqa tokarlyqty úıretýin suranyp habarlasatyndar da barshylyq. Alaıda olardyń kóbisi basqa óńirlerden eken. Iаǵnı qyzyǵýshylyqtary bolǵanymen, jerdiń shalǵaılyǵyna baılanysty kele almaıdy. Degenmen Qurbanáli tokarlyqty úırenýge nıet etken jastarǵa kómektesýge ár kez daıyn.
TÚRKISTAN
