Foto:Polisia.kz
Jaqynda Almatyda kıberpolısııa arnaıy operasııa júrgizip, onyń barysynda jaldamaly páterde shaǵyn avtomatty telefon stansııasyn uıymdastyrǵan 26 jastaǵy jigit ustalǵan.
Tintý kezinde SIM-kartalarǵa arnalǵan 32 slottary bar SIM-qorap, sondaı-aq uıaly baılanys kompanııalarynyń birine tıesili 285 SIM kartasy tabylǵan.
«Úıdi tintý kezinde 32 SIM-karta sloty bar SIM-qorap jabdyǵy, sondaı-aq uıaly baılanys kompanııalarynyń birine tıesili 285 SIM kartasy tabyldy. Bul jabdyqty ınternet-alaıaqtar anonımdi bolyp qala otyryp, ártúrli ınternet-qyzmetterdi jáne messendjerlerdi belsendirý, akkaýnttardy tirkeý úshin paıdalanady, olardyń kómegimen alaıaqtar basqa elde bola tura qazaqstandyqtarǵa telefon soǵady. Kúdikti osy jabdyqty ornatý, qosý jáne slottardaǵy SIM-kartalardy aýystyrýdan turatyn «jumysty» ınternetten tapqanyn aıtty. Qazirgi ýaqytta qylmystyq is aıasynda jedel sharalar júrgizilip jatyr. Ustalǵan azamat qamaýǵa alyndy», dedi Almaty qalalyq polısııa departamenti bastyǵynyń birinshi orynbasary Qýatbek Naýatov.
