Sýretti túsirgen – Igor Býrgandınov
Atalǵan kompanııa osydan 6 jyl buryn shaǵyn un dıirmenin iske qosty. Odan qatty bıdaıdyń, kúrishtiń, qara jáne qyzyl qumyqtyń, júgeriniń unyn shyǵara bastady. Qazir mundaǵy shyqqan un ónimi óz elimizben qatar, kórshi ózbek eliniń saýda sórelerinen de oryn alǵan.
Kompanııa byltyr «Damý-О́ndiris» memlekettik baǵdarlamasy arqyly «Qazaqstan Halyq bankinen» 270 mln teńge nesıe alǵan. «Damý» qory nesıe paıyzyn sýbsıdııalap, kepildik berý arqyly qoldaý kórsetipti. Bul qarajatty glıýtensiz makaron ónimderin óndirýdi bastaý úshin zamanaýı jabdyq satyp alýǵa jáne kombınat ǵımaratyn salýǵa jumsaǵan.
«О́tken jyldan bastap jańa joba – makaron sehyn salýdy qolǵa aldyq. Negizi makaron elimizde ejelden beri kóp. Alaıda glıýtensiz unnan jasalǵan makaron joqqa tán. Sondyqtan mundaı ónimdi shyǵarý boıynsha elde birinshi bolyp turmyz. Seh ǵımaratynyń aýmaǵy 330 sharshy metrdi alyp jatyr. Saǵatyna 200–250 kılo makaron óndirý qýatyna ıemiz», dedi kompanııanyń negizin qalaýshy Medelbek Aǵybaev.
Ádemi qaptamaǵa salynǵan ónimniń syrtyna qazaq, aǵylshyn, qytaı, orys tilderinde túsindirme jazylǵan. Kompanııanyń basty maqsaty – otandyq naryqty tolyq ıgerý. Sebebi bul ónimniń adam aǵzasyna tıgizer paıdasy asa mol. Negizi mundaı ónimdi allergııasy bar adamdar tutynady. Mysaly, kóbine bıdaı unynan allergııa bolady. Sondaı derti bar jandar júgeri men qara qumyq unynan jasalǵan taǵam tutynsa, allergııa aýrýyna ushyramaıdy.
«Osy júgeri, kúrish, qara jáne qyzyl qumyqtyń unyna halyqqa áýel basta birinshi bolyp biz usynǵan edik. Endi onyń makaronyn jasaýdy qolǵa aldyq. Bul ónimder birinshi kezekte asqazanǵa paıdaly. Sondaı-aq muny tutynǵan adam semirmeıdi. Ǵylymı turǵyda dáleldengen dáıek», dedi JShS bas dırektory Arman Beısembınov.
Bas dırektordyń aıtýynsha, kompanııanyń alǵa qoıǵan jospary úlken. Búginde sara unnyń bir bóligin kórshi ózbek eline eksporttap otyr. Al basty maqsaty eldegi saýda sórelerin tolyq ıgerip bolǵan soń, kúrish, qara, qyzyl qumyq jáne júgeri unynan jasalǵan taǵamdarǵa suranysy joǵary Qytaı naryǵyna shyǵýdy kózdep otyr.
Qazir saǵatyna 200-250 keli sara makaron shyǵaryp otyrǵan kombınattyń óniminiń sapasy óte jaqsy dep baǵalanǵan. «Sondyqtan aldaǵy ýaqytta shet memleketterden tapsyrys kóp túsedi degen senimimiz mol. Ári óz elimizde de bizdiń ónimge degen suranys kúnnen-kúnge artyp kele jatyr», dedi Arman Beısembınov.
