Bıyl Qazaqstannan Reseıde bilim alýǵa beriletin kvota sany 800 orynǵa deıin kóbeıgen. Bul – Reseıde tegin bilim alǵysy keletin jastarǵa úlken múmkindik. Aıta keteıik, ótinish berý merzimi 2024 jyldyń 15 qańtaryna deıin jalǵasady. Reseıdiń «Rossotrýdnıchestvo» uıymynyń Qazaqstandaǵy ókildiginiń basshysy Olga Fılonova bul kvotalardyń mańyzdylyǵyn atap ótti.
«Kvotalyq baǵdarlama Qazaqstannan shyqqan talantty jastardyń Reseıde sapaly bilim alýyna jol ashady. Jyl saıyn kórmege qatysýshylar sany artyp keledi. Bul talapkerlerdiń Reseıdegi joǵary oqý oryndaryna qyzyǵýshylyǵy arta túskenin kórsetedi. Reseı úkimeti kvota sanyn kóbeıtý arqyly jastardyń bilim alýyna mol múmkindik berip otyr», dedi ol. Ýnıversıtetterdiń kóbi stýdentterdi jataqhanamen qamtamasyz etetinin ári qosymsha áleýmettik qoldaý kórsetiletinin jetkizdi. Olga Fılonovanyń aıtýynsha, Reseıdegi ýnıversıtetterge túsýge kvotadan bólek te múmkindik bar. «Talapkerler ýnıversıtetterge óz betimen ótinim bere alady. Kóptegen ýnıversıtette aqyly oqýǵa bolady. Keıbireýlerinde olımpıada nátıjeleri boıynsha, al keıbireýlerinde ishki emtıhan nátıjeleri boıynsha qabyldaıdy», dedi ol.
Kórmege qatysyp jatqan V.I.Lenın atyndaǵy Ivanov memlekettik energetıka ýnıversıtetiniń ókili Eva Sergeevanyń aıtýynsha, kelgen jastardyń maqsaty qazir de aıqyn. Olardyń armandaryna jetý jolyndaǵy talpynysy erekshe. «Eń aldymen, osyndaı aýqymdy ári mańyzǵa ıe is-sharany uıymdastyrǵan Reseı Ulttyq zertteý ýnıversıtetine alǵysymyzdy bildiremiz. Barlyǵy joǵary deńgeıde ótip jatyr. Bul kórmege úlken qýanyshpen keldik. Munda bilimge qushtar, bolashaqqa senimmen qaraıtyn talapkerler kóptep kelip jatyr. Jastardyń osyndaı maqsatshyl bolýy shynymen de qýantady. Biz olarǵa kómektesýge ázirmiz. Bizdiń ýnıversıtet tehnıkalyq baǵyttarǵa mamandanǵan. Dál osy baǵytta suranys ta joǵary», dedi Eva.
Astanaǵa Reseıdiń ár óńirinen kelgen ýnıversıtet ókilderi talapkerlerge óz oqý oryndarynyń erekshelikteri týraly aqparat berip, olardyń suraqtaryna jaýap berdi. Kórmede tehnıkalyq, medısınalyq, IT, ekonomıka, shyǵarmashylyq baǵyttaǵy mamandyqtarǵa degen qyzyǵýshylyq joǵary boldy. Mysaly, Krasnoıar memlekettik agrarlyq ýnıversıteti ókili Iýlııa Olensovanyń aıtýynsha, talapkerler arasynda veterınar, bıotehnologııa, landshafttyq sáýlet, agroınjenerııa, IT mamandyqtary kóp suranysta bolǵan. Al Máskeýdegi A.N.Kosygın atyndaǵy Reseı memlekettik ýnıversıtetiniń ókili Alevtına Zozoleva talapkerler shyǵarmashylyq mamandyqtarǵa da qyzyǵýshylyq tanytqanyn atap ótti. Bul ýnıversıtette IT tehnologııalary, kıim konstrýksııasy, dızaın, mýzykalyq shyǵarmashylyq, vokal óneri boıynsha grant negizinde bilim alýǵa bolady.
Reseı memlekettik zııatkerlik menshik akademııasy ókili, professor Natalıa Panamarevanyń aıtýynsha, bul kórme eki el arasyndaǵy yntymaqtastyqty arttyryp, bilim alýshylardyń tájirıbe almasýyna úlken múmkindik beredi.
«Bizdiń túlekter – Reseıdegi eń úzdik zańgerler qatarynda. Bul kórsetkish boıynsha biz MMÝ-dy da basyp ozdyq. Bizdiń túlekterdi reseılik korporasııalar men kommersııalyq qurylymdar qýana qabyldaıdy. Zııatkerlik menshik akademııasy talapkerlerdi kvota negizinde ári olımpıada nátıjeleri boıynsha qabyldaýǵa daıyn. Sondaı-aq stýdentterdi jaqtaqhanamen qamtamasyz etemiz. Aıta keteıin, biz Qazaqstandaǵy joǵary oqý oryndarymen tyǵyz baılanystamyz. Únemi tájirıbe almasyp otyramyz», dedi ol.
Kórmege kelgen talapkerlerdiń kóbi óz maqsaty men baǵytyn aıqyndap úlgergen. Máselen, 11-synyp oqýshysy Nurlan Isaev óz baǵytyna saı ýnıversıtetti tańdap úlgergen. «Men Máskeýdiń ıadrolyq fızıka jáne ınjenerııa ınstıtýtyna qyzyǵyp otyrmyn. Onda men oqyǵym keletin mamandyq bar eken. Osy kórme maǵan óz sheshimimdi naqtylaýǵa kómektesip jatyr», dedi ol.
«Rossotrýdnıchestvo» ókili Olga Fılonovanyń aıtýynsha, Reseıdegi joǵary oqý oryndarynda sheteldik stýdentterge óte jaqsy qoldaý kórsetiledi. «Reseıde qazaqstandyq stýdentter úshin kóptegen bıýdjettik oryn qarastyrylǵan. Keıbir ýnıversıtetterde olımpıada jeńimpazdaryna basymdyq beriledi. Biz stýdentterge tek bilim berip qana qoımaı, olardyń halyqaralyq deńgeıde tájirıbe jınaýyna jaǵdaı jasaımyz», dedi O.Fılonova.
