Aqtóbede Álııa Moldaǵulovanyń sińlisine kómek kórsetildi

AQTО́BE. 30 sáýir. Aqtóbe oblysynda Uly Jeńistiń 70 jyldyǵy qarsańynda birqatar merekelik sharalar uıymdastyrylyp, qaıyrymdylyq aksııalary ótýde. Osyndaı sharaǵa Aqtóbe oblysynyń sýdıalar qaýymdastyǵy da atsalysyp, «Ardaǵym – ardagerim» atty aksııany júzege asyrýda. Bul týraly egemen.kz habarlady. Buǵan deıin de birqatar qaıyrymdylyq is-sharalaryn uıymdastyrǵan qaýymdastyq jaqynda taǵy bir ımandylyq iske uıytqy boldy. Oblystyń sýdıalar qaýymdastyǵy atynan Qazaqstan Respýblıkasy sýdıalar Odaǵy Aqtóbe fılıalynyń tóraǵasy Dámesh Ábdáli men oblystyq sottyń keńse basshysy Áset Mámbetov Keńes Odaǵynyń Batyry Álııa Moldaǵulovanyń sińlisi Álip Úsenovanyń úıine baryp, kele jatqan merekemen quttyqtap, ápkesiniń basyna baryp-kelý úshin jol shyǵynyna 200 myń teńge qarjylaı kómek kórsetti. «Meniń qazir jasym 75-te, qansha ómirim qalǵanyn Alla biledi. Sondyqtan, sońǵy ret ápkemniń basyna baryp, topyraq salsam, sodan keıin tynysh uıyqtaıtyn bolamyn. Qazaqtyń batyr qyzynyń rýhyna adaldyq tanytyp, meniń jaǵdaıymdy túsingenderińe myń da bir rahmet, órkenderiń óssin», – dedi Álip apa rızashylyǵyn bildirip. Álııa Moldaǵulova 1943 jyldyń tamyz aıynda maıdanǵa attanyp, ekinshi Baltyq jaǵalaýy maıdanyndaǵy №22 armııanyń №54 arnaıy atqyshtar brıgadasynyń quramynda soǵysqan. Qazaqtyń qaısar qyzy jaý áskeriniń 78-den astam sarbazdary men ofıserleriniń kózin joıǵan. Shyǵystyń qos shynarynyń biri Álııa Moldaǵulova urysta aýyr jaraqat alyp, 1944 jyldyń 14 qańtarynda Pskov oblysynyń soltústiginde qaza tapqan. Oǵan 1944 jyldyń 4 maýsymynda Keńes Odaǵynyń Batyry ataǵy berildi. Álııa esimimen ondaǵan kósheler, mektepter, áskerı-teńiz flotynyń kemeleri, Kaspııde júk tasıtyn teplohod atalady. Aqtóbe, Astana, Almaty, Máskeý, Sankt-Peterbýrg, Novosokolnıkı qalalarynda eskertkishter men memorıaldyq taqtalar ornatylǵan. Aqtóbede Álııa Moldaǵulova atyndaǵy arnaıy oblystyq memorıaldyq mýzeı jumys isteıdi. Satybaldy Sáýirbaı. Derek, sýret: egemen.kz.