– Buǵan deıin qol jetkizilgen ýaǵdalastyqtarǵa sáıkes Qazaqstanda Reseıdiń jetekshi tehnıkalyq bilim berý mekemeleriniń 7 fılıaly ashyldy. Kóp uzamaı Astanada Máskeý memlekettik halyqaralyq qatynastar ınstıtýtynyń fılıaly esigin aıqara ashady. Al búgin Omby qalasynda ál-Farabı atyndaǵy Qazaq ulttyq ýnıversıtetiniń fılıaly óz jumysyn bastady. Bul – qazaqstandyq joǵary oqý ornynyń Reseıdegi alǵashqy ókildigi. Sonymen qatar Reseıdiń shekara mańy aımaqtarynda qazaq mektepterin salý, sáıkesinshe Qazaqstan aýmaǵynda (dálirek aıtsaq Jambyl, Qyzylorda jáne Túrkistan oblystarynda) reseılik mektepterdi ashý máselesi qarastyrylyp jatyr. Bul eki eldiń bilim berý salasyndaǵy baılanystaryn nyǵaıtyp, óskeleń urpaq úshin jańa múmkindikterge jol ashady, – dedi Qazaqstan Prezıdenti.
Memleket basshysy orys tili qos halyqtyń yntymaǵyn jarastyratyn mańyzdy faktor ekenin atap ótti.
– Elimizdegi mektep oqýshylarynyń úshten biri orys tilinde bilim alady. Biz bul máselege erekshe mańyz beremiz. Halyqaralyq orys tili uıymyn qurýdy dál osy sebepti usyndym. Kelissózderde kóterilgen taǵy bir mańyzdy taqyryp – eki eldiń aýmaǵynda ómir súrip jatqan qandastarymyzdy qoldaý. Bul rette «Otandastar» qory men «Rossotrýdnıchestvo» arasynda yntymaqtastyq týraly memorandýmǵa qol qoıýdyń mańyzy zor bolar edi. Mundaı ýaǵdalastyqtar halyqtarymyzdyń ózara túsinistigin tereńdetýde erekshe ról atqarady, jurtshylyq arasynda keńinen qoldaý tabady, – dedi Memleket basshysy.
