Sýretti túsirgen – Tıshbek Hamıtov
Saltanatty keshke óner men mádenıet qaıratkerleri, ár jyldary Qarqaralyǵa án-jyryn arnaǵan aqyn, sazger men jeztańdaı ánshiler qatysty.
Alys-jaqynnan kelgen meımandarǵa, ánsúıer qaýymǵa aýdan ákimi Ádiljan Arǵynov quttyqtaý sózin jetkizip, lebizin bildirdi.
Odan soń Mádı Bápıulynyń áıgili ánimen atalǵan «Atyńnan aınalaıyn, Qarqaraly!» án jınaǵynyń tusaýkeser rásimi jasaldy. Qarqaralynyń 200 jyldyq toıyna erekshe tartý-taralǵy bolǵan án jınaqtyń tusaýyn Qazaqstannyń eńbek sińirgen qaıratkeri Rymbala Omarbekova, aýdan basshysy Ádiljan Arǵynov, Qazaqstannyń mádenıet qaıratkeri Qarlyǵash Quspanova, belgili kompozıtor Qanat Mersalımov kesip, alpystan astam án jınaqtalǵan toptamaǵa sát sapar tiledi.
Sahnada elge keńinen tanylǵan ásem ánder shyrqaldy. Ádemi áýender týǵan jerdi terbedi, tyńdarman qaýymnyń júregin tebirentti.
Dástúrli án óneriniń búgingi alyby Jaqsygeldi Kemalov bastaǵan Dáýrenbek Árkenov, Serjan Musaıyn, Nurlytań Saıatqyzy, Sársen Ábishev, Azamat Amantaıuly syndy talanttardyń ánine qulaq saldy.
«Saltanat» án-bı ansambliniń, «Qarqaraly áýenderi» ansambliniń, «Ańyz» horeografııalyq bı tobynyń, óner mektebi órenderiniń, jergilikti ónerpazdardyń bekzada ónerine bek tánti bolyp, qoshemet bildirdi.
Osylaısha Arqanyń injý-marjany atanǵan Qarqaralyǵa arnalǵan ánder jınaqtalyp, el ishine taralyp, tarıhqa aınaldy.
Qaraǵandy oblysy
