Kásibı teatry joq aýdandardaǵy óner kórsetip júrgen halyq teatrlary jergilikti jurttyń mádenı ómirine ár berip, rýhanı-estetıkalyq suranysyna saı qyzmet etýge tyrysyp keledi. Aýdanda ótken baıqaýǵa usynylǵan qoıylymdar men teatr ujymdarynyń sahnadaǵy sheberlik deńgeıi de kópshilikti tánti etti. Teatrlardyń repertýarynda jastardy otansúıgishtikke tárbıeleıtin zamanaýı shyǵarmalardyń bolýyna, sonymen qatar teatrlardyń ónerin nasıhattaý, bir-birimen tájirıbe almasý, sheberlik saǵattaryn ótkizý jáne shyǵarmashylyq baılanysty nyǵaıtýǵa yqpal etý maqsatyndaǵy baıqaýda qazylar alqasynyń sheshimimen bas júldeni «Keles» halyq teatry ıelendi. Júldeli I oryndy Shymkent qalasynyń «Dýman» halyqtyq jastar teatry, II oryndy «Temirlan» halyq teatry, «Saıram» aýdandyq qazaq halyq teatry, Saryaǵash aýdany halyqtyq drama ujymy ıelendi. Júldeli III oryndy Ordabasy aýdandyq mádenıet úıi janynan qurylǵan «Jas tolqyn» balalar men jasóspirimder úlgili teatry, «Shardara», «Asyqata», «Otyrar» halyq teatrlary ózara bólisti. Sondaı-aq birqatar teatr ujymy arnaıy júldemen jáne alǵys hattarmen marapattaldy.
Aıta keteıik, dástúrli baıqaý oblystyq mádenıet basqarmasy, Ordabasy aýdany ákimdiginiń bastamasymen aýdannyń 60 jyldyǵy, «Temirlan» halyq teatrynyń 50 jyldyǵyna oraı ótkizilip otyr. Dástúrli baıqaýdy kelesi jyly ótkizý úshin estafetany Otyrar aýdany qabyldady.
Túrkistan oblysy
