Mınıstrlik aqparatyna súıensek, aýyl mektepteriniń oqýshylary arasynda jaratylystaný-matematıka baǵytyndaǵy respýblıkalyq olımpıada osymen ekinshi ret ótkizilip otyr. Jaqynda sol II respýblıkalyq olımpıadanyń nátıjesi shyǵaryldy. Qorytyndy kezeńge 486 oqýshy qatysyp, onyń ishinde 221 oqýshy jeńimpaz atandy. Bul balalar – elimizdiń eń shalǵaı aımaqtarynan kelgen bilim alýshylar.
Marapattaý rásimine qatysyp, júldegerlerdi jeńisimen quttyqtaǵan Orta bilim berý komıtetiniń tóraǵasy Qanybek Bekbolatov olımpıadanyń birinshi kezeńinen ótken qatysýshylardyń qatary kóbeıip kele jatqanyn jetkizdi.
«Oqý-aǵartý mınıstrligi aýyl mektepteriniń talantty jáne bilimge qushtar oqýshylaryn anyqtaý maqsatynda respýblıkalyq olımpıadany ekinshi jyl qatarynan ótkizip otyr. Eger byltyr olımpıadanyń birinshi kezeńine 78 myń oqýshy qatyssa, bıyl olardyń sany 113 myńnan asty. Bul aýyl oqýshylarynyń zııatkerlik jarystarǵa degen qyzyǵýshylyǵynyń artyp kele jatqanyn, respýblıkalyq olımpıadanyń mártebesi joǵary ekenin kórsetedi. Barshańyzdy jetistikterińizben quttyqtaımyn jáne bilim jolynda jańa tabys tileımin!» dedi komıtet tóraǵasy.
Pavlodar oblysynan kelgen Imran Qusaıynov pen Qyzylorda oblysynan baq synaǵan Tóre Baltabaev «Olımpıadanyń eń jas qatysýshysy» atalymy boıynsha dıplomdarmen marapattaldy. Daryndylar dodasynyń eń jas qatysýshysy Tóre Baltabaev jarys týraly óz oıyn: «Men 6-synypta oqımyn, biraq olımpıadaǵa 9-synyptyń baǵdarlamasymen qatysamyn. Bizdiń elde bilim alyp, ǵylymmen aınalysýǵa múmkindik kóp. Memleketimiz talantty balalardy qoldaýǵa erekshe kóńil bóledi. Biz úshin olımpıadalar, baıqaýlar uıymdastyrylady, al úzdikter halyqaralyq jarystarǵa jiberiledi. Men de olımpıadalyq rezervtiń bir bóligi bolýdy, bilimimdi odan ári jetildirip, bir kúni elim úshin altyn medal utyp alýdy armandaımyn», dep jetkizdi.
«Úzdik olımpıadalyq komanda» atalymy boıynsha I dárejeli dıplomdardy Qyzylorda, Túrkistan jáne Mańǵystaý oblystarynyń qurama komandalary ıelendi. Jeńimpazdarǵa elimizdiń jetekshi joǵary oqý oryndarynyń 8 rektorlyq granty tabystaldy, tarqatyp aıtqanda, 6 grant – SDU-dan, 2 grant – Qoja Ahmet Iаsaýı atyndaǵy Halyqaralyq ýnıversıtetinen kelgen qatysýshylarǵa taǵaıyndaldy. Sondaı-aq matematıka, fızıka jáne ınformatıka pánderinen I dárejeli dıplom ıegerleri – 9–10-synyp oqýshylaryna Almaty qalasyndaǵy Respýblıkalyq fızıka-matematıka mektebinde 2025–2026 oqý jylynda bilim alýǵa grant berildi.
Mınıstrliktiń deregine qaraǵanda, aýyl mektepteriniń oqýshylaryna arnalǵan respýblıkalyq olımpıadada barlyǵy 221 medal sarapqa salyndy, munyń 117-si – qola, 62-si – kúmis jáne 42-si – altyn medal. Atalǵan bilim báıgesi 13 pán boıynsha ótedi, jaratylystaný-matematıka jáne qoǵamdyq-gýmanıtarlyq baǵyttardy qamtıdy, úsh kezeńnen turady. Mektep kezeńine 99 264 oqýshy qatysyp, olardyń 53 593-i aýdandyq kezeńge ótti. Oblystyq kezeńde 12 000 oqýshy baq synady, al fınalǵa 1000-ǵa jýyq oqýshy shyqty. Sonyń ishinde 486 oqýshy jaratylystaný-matematıka baǵytyndaǵy olımpıadaǵa qatysty, al 450 oqýshy qoǵamdyq-gýmanıtarlyq baǵyt boıynsha olımpıadaǵa qatysady. Qoǵamdyq-gýmanıtarlyq baǵyt boıynsha olımpıada 10–14 jeltoqsan aralyǵynda Astanada ótedi.
Aıta keteıik, olımpıadanyń qorytyndy kezeńine qatysqan barlyq oqýshy «Daryn» respýblıkalyq syrttaı mektebine qabyldanady. Al I dárejeli dıplom ıegerleri 2025 jylǵy naýryz aıynda ótetin jalpy bilim beretin pánder boıynsha respýblıkalyq olımpıadanyń sońǵy kezeńine qatysady.
