Oǵan qosa qyrkúıek aıynda Almaty qalalyq ekologııa jáne qorshaǵan ortany qorǵaý basqarmasy polısııa departamentimen birigip, eski jıhaz, synǵan turmystyq tehnıka, qurylys qaldyqtaryn beı-bereket tastaǵan turǵyndarǵa aıyppul salýǵa sheshim qabyldaýǵa májbúr boldy.
Sebebi turmystyq qaldyqtardy ońdy-soldy laqtyrý tek konteınerlik alańdardaǵy olqylyq emes, keleńsiz kórinister qalanyń sanıtarlyq, ekologııalyq jaǵdaıyna da kesirin tıgizedi. Sondyqtan udaıy uıymdastyrylatyn senbiliktermen qatar, aýzy-murnynan shyǵyp jatatyn qoqys jáshikterin tazalaý, retteý maqsatynda qosymsha patrýl engizilip, «Taza Qazaqstan» aksııasynan bastaý alǵan «Almaty – bizdiń ortaq úıimiz» naýqany kezinde «Qoqysty durys surypta», ekologııalyq týrlary ótti.
Tazalyq máselesi munymen shektelmeıdi. Taıaý kúnderi qala ákimi Erbolat Dosaev Bostandyq aýdanynyń turǵyndarymen kezdeskende: «Kelesi jyly da qoqys alańdaryn jańǵyrtý jalǵasady. Barlyǵyn retke keltiremiz. Apta aıaǵy, jumadan bastap, demalys kúnderi konteınerler qoqysqa tolyp qalatynyn bilemin», dedi.
Qysqasy, kelesi jyly megapolıste 800 qoqys alańyn jańartý josparlanyp otyr. Al qala ákimi turǵyndarǵa kólemi úlken qoqystardy kez kelgen jerge tastaýǵa bolmaıtynyn eskertti. «Osy maqsatta qatań jaza qarastyrylǵan jańa erejelerdi bekittik. Sondaı-aq qoqys alańdaryna kameralar ornatamyz. Bul bizge tazalyq saqtamaıtyndardy jedel anyqtaýǵa múmkindik beredi. Kelesi jyly alǵashqy 400 kamerany iske qosamyz», dedi qala ákimi.
Endigi jerde kommýnaldyq qaldyqtardy basqarý qaǵıdalaryna sáıkes jyljymaıtyn nysandar salý men jóndeýdi júzege asyratyn jeke jáne zańdy tulǵalar qurylys qaldyqtaryn, kólemi úlken qaldyqtardy arnaıy oryndarǵa jetkizýge osyǵan mamandanǵan uıymdarǵa aqyly túrde júginip, bolmasa ózderi Almaty oblysynyń Ile, Qarasaı aýdandarynda ornalasqan polıgondarǵa jetkizýleri tıis.
ALMATY
