Mereıtoılyq gala-konsert shymyldyǵy sımfonııalyq orkestrdiń sıqyrly únimen ashylyp, kórermen qaýym Júsipbek Elebekovtiń altyn qorda saqtalǵan jarqyn beınesimen qaýyshty. Jıynda Mádenıet jáne aqparat mınıstri Aıda Balaeva óner ordasynyń ujymyna Memleket basshysy Qasym-Jomart Toqaevtyń quttyqtaýyn jetkizdi.
«Bul – elimizdiń rýhanı ómirindegi mereıli beles. Irgeli bilim ordasy osy kezeńde tól mádenıetimizdiń altyn dińgegine aınaldy. Ulttyq mýzykamyzdyń biregeı dástúri bar ustahanasy retinde tanyldy. Qazaqtyń án-kúı ónerin jańa deńgeıge kóterip, onyń ǵylymı negizin qalyptastyrdy. Konservatorııa – daryndy jastarǵa klassıkalyq mýzykanyń qyr-syryn úıretip, kásibı mýzykanttar daıarlaıtyn alǵashqy joǵary oqý orny. О́rkenıetimizdiń órisin keńeıtip, ony jer júzine tanytqan kóptegen maıtalman maman osy qara shańyraqtan qanat qaqty. Aǵa býyn salǵan sara joldy keıingi urpaq laıyqty jalǵastyryp keledi. Olar elimizdiń shyǵarmashylyq uıymdarynda tabysty eńbek etip júr. Osy oraıda ulttyq ónerimizdi jan-jaqty dáriptep, rýhanııatymyzdy damytýǵa zor úles qosqany úshin konservatorııa ujymyna shynaıy rızashylyǵymdy bildiremin» delingen Prezıdenttiń quttyqtaý hatynda.
Aıda Ǵalymqyzy eldegi jetekshi mýzykalyq oqý ornynda Qazaqstan óneriniń bútin bir tarıhy jasalǵanyn, munda bilim alǵan elimizge tanymal kompozıtorlar, oryndaýshylar ultymyzdyń maqtanyshyna aınalyp, elimizdi álemdik mýzykalyq arenada dańqqa bólegenin atap, oqý ornynyń 13 qyzmetkerine «Úzdik pedagog» tósbelgisin taqty.
Saltanatty is-sharaǵa elimizdiń mádenı qazynasyna ólsheýsiz úles qosqan óner maıtalmandary qatysty. Olardyń qatarynda Asanáli Áshimov, Álibek Dinishev, Jámılıa Baspaqova, Roza Rymbaeva, Úmitjan Jumaqova, Marıam Qojamqulova, Almas Almatov, Serik Erkimbekov, Karıma Saharbaeva, Dúısen Qaseıinov, Altynbek Qorazbaev, basqa da óner qaıratkerleri bar.
Konservatorııa stýdentterine elimizge jáne álemge tanymal oryndaýshylar sheberlik sabaqtaryn dástúrli túrde ótkizip keledi. Olardyń ishinde ataqty skrıpkashylar Aıman Musahodjaeva, Marat Bısenǵalıev, reseılik skrıpkashy Nazar Kojýhar, dırıjerler Alan Bóribaev pen Abzal Muhıtdınov, pıanıst Nurlan Izmaılov, ánshi Talǵat Musabaev, Aıgúl Úlkenbaeva sekildi talant ıeleri bar.
«Qazaq ulttyq konservatorııasynyń Qurmanǵazy ataýyn alyp júrýiniń ózinde úlken mán bar. Kez kelgen qazaqqa Qurmanǵazy – kúı óneriniń etalony, sheberliktiń shyńy. Jahandaný dáýirinde halyq óziniń bolmysyn tek mádenıet arqyly, óner arqyly saqtap qalady. О́ıtkeni ulttyń damýyna úles qosyp, jastardy tektilikke tárbıelep otyrǵan osyndaı óner ordalary dep bilemin», deıdi dástúrli ánshi A.Úlkenbaeva.
Ulttyq án-kúı qorymyzdyń injý-marjan muralarymen qatar álemdik jaýharǵa balanatyn dańqty týyndylar asqaqtaǵan aıryqsha dýmandy kórermen úsh saǵat boıy tapjylmaı tamashalady. Konsert júrgizýshileri mereıli keshke qatysqan ónerpazdar Qurmanǵazy atyndaǵy konservatorııany týǵan úıindeı kóretin, qaıta-qaıta oralyp, jastyqtyń jáne shabyttyń qýatyn sezingisi keletin ártisterdiń az ǵana bóligi ekenin aıtyp, kórermenmen qımaı qoshtasty.
ALMATY
