Prezıdentke energetıkalyq jáne kommýnaldyq ınfraqurylymdy jańǵyrtý boıynsha ulttyq jobanyń ázirlený barysy jóninde aqparat berildi.
– aldaǵy bes jylǵa arnalǵan joba aıasynda energetıkalyq jáne kommýnaldyq sektordyń qoldanystaǵy ınfraqurylymyn jańartý, 6 myń megavattan asa elektr qýaty generasııasyn iske qosý men jańǵyrtý jumystaryn júrgizý qarastyrylǵan;
– jobanyń jalpy quny 10 trıllıon teńgeden asady. Qajetti qarajat naryqtan zaım negizinde, sondaı-aq ishinara respýblıkalyq bıýdjetten tartylady;
– keshendi jańǵyrtý jumystary energetıkalyq nysandar men kommýnaldyq sektordyń tozýyn birshama tómendetip, halyqtyń turmys-tirshiligin qamtamasyz etý júıelerin jetildiredi;
Sonymen qatar óńirlik saıasatty iske asyrýdyń jańa tásilderi týraly málimet berildi:
– bul shara oblystar arasyndaǵy áleýmettik, óndiristik jáne kommýnaldyq ınfraqurylymdy qamtamasyz etý barysyndaǵy alshaqtyqty joıýǵa baǵyttalǵan;
– Prezıdenttiń tapsyrmasyn oryndaý maqsatynda memlekettik baǵdarlamalardy júzege asyrýdy júıeli úılestirý úshin Úkimet janynan О́ńirlik saıasat jobalyq keńsesi qurylady;
Mańǵystaý oblysynda avıasııalyq habty damytý jónindegi ınvestısııalyq jobany iske asyrý perspektıvasyn baıandady. Atalǵan joba óńirdiń ekonomıkalyq ósimine tyń serpin berip, halyqaralyq kólik-logıstıka tizbeginiń mańyzdy bóligine aınalady.
Qasym-Jomart Toqaev Qanat Bozymbaevqa Energetıkalyq jáne kommýnaldyq ınfraqurylymdy jańǵyrtý boıynsha ulttyq jobany muqııat daıyndap, jyl sońyna deıin bekitýdi tapsyrdy. Sonymen qatar О́ńirlik saıasat tujyrymdamasyn belsendi iske asyrý mindetin júktedi.
