Foto: aikyn.kz
Oblys ákimdiginiń habarlaýynsha, óńirde áleýmettik ınfraqurylymdy damytý aıasynda 36 bilim berý nysanyn salý (10 600 oryn) josparlanǵan. Bıylǵy 10 aıdyń qorytyndysyna sáıkes 13 bilim oshaǵy paıdalanýǵa berilgen, onyń úsheýi «jaıly» mektep. Jyl sońyna deıin taǵy 2 nysandy qoldanysqa berý josparlanǵan (1 mektep, 1 mektepke qosymsha ǵımarat).
Nátıjesinde 7 oqý orny tapshylyǵy bar, 3 úsh aýysymdy, 3 tozyǵy jetken jáne 2 apatty mekteptiń máselesi sheshilmek.
«2025 jyly jasandy ıntellekt arqyly qaterli isikti anyqtaýdyń mamandandyrylǵan júıesin engizý jobasyn júzege asyrý josparlanǵan. Oblysta 15 dene shynyqtyrý-saýyqtyrý kesheni salynyp jatyr, búginge deıin onyń tórteýi jáne 103 sport alańy ashyldy. Jyl sońyna deıin taǵy 6 sport kesheni qoldanysqa beriledi dep kútilip jatyr. Bıýdjetten tys 880 mln. teńgege 4 sport nysany boı kóterdi, «Qazaqstan halqyna» qoǵamdyq qory esebinen 2 modýldik sport zalyn ashý josparda bar. 5 mádenıet nysany esigin aıqara ashty (4 mádenıet úıi men 1 mýzeı), jyl sońyna deıin taǵy 3 nysan el ıgiligine tapsyrylady. Asqar Toqpanov atyndaǵy oblystyq qazaq drama teatrynyń ǵımaratyna, Kenen Ázirbaev atyndaǵy oblystyq fılarmonııanyń kórermender zalyna aǵymdaǵy jóndeý jumystary júrgizildi», dedi Erbol Qarashókeev.
Sonymen qatar oblys ákimi bıyl memlekettik shyǵarmashylyq tapsyryspen 1,3 mlrd. teńgege 224 úıirmede 9,1 myń bala qamtylǵanyn atap ótti.
Baspasóz alańynda óńirdiń týrıstik áleýetiniń damýyna da toqtalǵan. Atalǵan salada 16,4 mlrd. teńgeniń 13 ınvestısııalyq jobasy júzege asyrylyp jatyr. Otandyq jáne sheteldik týrıster úshin 6 nysan ashyldy, onyń ishinde qonaq úıler, demalys oryndary, jol boıyndaǵy qyzmet kórsetý nysandary bar. Týrıstik oryndarǵa baratyn joldar jóndelip, gazdandyrý máselesi sheshildi.
