Sıfrlyq monıtorıng júıesi Memleket basshysynyń 2023 jylǵy 11 maýsymdaǵy tapsyrmasy aıasynda júzege asyrylyp jatyr. Búginde oblystyń bes orman sharýashylyǵynda – Baqanas, Qaskeleń, Kúrti, Shelek, Qaradala aýmaqtarynda 18 apparattyq-baǵdarlamalyq keshen ornatylǵan.
Júıege qosylǵan zamanaýı beınekameralar táýlik boıy órt qaýpi joǵary aımaqtardy baqylap, tútin men ot tutaný oshaqtaryn erte kezeńde anyqtaıdy. Aqparat naqty ýaqyt rejiminde jedel qyzmetterge jetkizilip, qaýiptiń aldyn alýǵa, órttiń taralýyna jol bermeýge múmkindik beredi.
Almaty oblysynyń Tabıǵı resýrstar jáne tabıǵatty paıdalanýdy retteý basqarmasynyń málimetinshe, qabyldanǵan sharalar aıtarlyqtaı nátıje bergen. 2022 jyly orman órtteri sharpyǵan aýmaq 784 gektardan assa, ótken jyly bul kórsetkish 53 gektarǵa deıin qysqarǵan. Bul – shamamen 14 ese az. Mamandardyń aıtýynsha, beınemonıtorıng júıesi erte anyqtaý men jedel áreket etý tıimdiligin odan ári arttyrady.
О́rttiń aldyn alý sharalary ormandy qalpyna keltirý jumystarymen de tyǵyz baılanysty. 2021–2025 jyldarǵa arnalǵan 2 mlrd aǵash otyrǵyzý jónindegi ulttyq joba aıasynda Almaty oblysynda 43,7 mln aǵash otyrǵyzylyp, 19,8 myń ga aýmaq qamtyldy. Orman otyrǵyzý, tuqym sebý jumystary 100%-ǵa oryndaldy. Aldaǵy jyldary bul jumys jalǵasyn tabady. О́ńirde qosymsha 8,9 mln aǵash otyrǵyzylyp, 4 myń ga jer kógaldandyrylady.
Jańa tehnologııalardy engizý men aýqymdy ormandy qalpyna keltirý jumystary tabıǵı órtterdiń aldyn alyp qana qoımaı, jasyl aımaqtardyń kólemin ulǵaıtyp, óńirdiń ekologııalyq qaýipsizdigin nyǵaıtýǵa septigin tıigizedi.
Almaty oblysy
