Qazaqstandyqtar ıpotekalyq nemese basqa nesıe alýǵa ótinish bergende, bank onyń qarjylyq jaǵdaıyn jáne qaryzdaryn tóleýge qabiletin tekseredi. Oǵan qaryz alýshynyń basqa da mindettemeleri kiredi. Mysaly, nesıeler, alıment, aıyppuldar nemese basqa da qaryz.
Eger qaryz alýshy óziniń tólem qabiletin dáleldeı alsa, aǵymdaǵy qaryzyn ótese jáne qajetti qujattardy usynsa, ıpotekalyq nemese basqa nesıeni maquldaý yqtımaldyǵy aıtarlyqtaı artady. Osylaısha, lombard aldyndaǵy qaryz nesıe alýǵa kedergi bolmaıdy. Biraq ótinish berýshiniń ótelmegen nemese merzimi ótken bereshekteriniń bolýy nesıeni maquldaý yqtımaldyǵyn azaıtady.
Bul rette birneshe jaıtty eskerý qajet. Atap aıtqanda, lombardtar kredıttik bıýrolarǵa mıkrokredıtter týraly aqparatty berýge mindetti. Bul aqparat qaryz alýshynyń nesıe tarıhynyń bir bóligine aınalady jáne onyń nesıe boıynsha esebinde kórsetiledi.
Sonymen qatar, qaryzdy óteý merzimi ótken jaǵdaıda lombard qaryz ornyna qabyldap alǵan baǵaly buıymdy keminde taǵy 30 kún saqtaýǵa mindetti. Osy ýaqyt ótkennen keıin atalǵan buıymdy satýǵa quqyly. Kepilge salynǵan múlikti satý kezinde lombardtaǵy zattardy kepilge berý týraly shart buzylady, bul rette qaryz alýshynyń mindettemeleri joıylady.
Inbusiness.kz saıty jazǵandaı, kepil zatty satý aktisi nemese ony lombardtyń menshigine aınaldyrý týraly sheshim jáne qaryzdy óteý týraly anyqtama sııaqty qujattar qaryzdyń toqtatylǵanyn rastaıdy.
Nesıelik esepte qamtylǵan aqparatpen kelispegen jaǵdaıda, qaryz alýshy aqparat berýshige (nesıe berýshige) nemese kredıttik bıýroǵa aqparatty daýlaý úshin júginýge quqyly. О́tinishte jeke tulǵanyń tegi, aty, ákesiniń aty, turǵylyqty jeri, jeke basyn kýálandyratyn qujattyń derektemeleri, málimetteri, sondaı-aq, kredıtordyń aty-jóni, ótinish berýshiniń nemese onyń ýákiletti ókiliniń qoly qoıylýy tıis. О́tinishke ótinish berýshi kórsetken bereshekti ótegendi rastaıtyn qujattardyń kóshirmeleri qosa berilýi tıis. О́tinishti qaraý merzimi kredıttik bıýroǵa kelip túsken kúnnen bastap 15 jumys kúnin quraıdy.
Kredıttik esepte málimetterdiń burmalanýy rastalǵan jaǵdaıda kredıtor derek anyqtalǵan kúnnen bastap 10 jumys kúni ishinde kredıttik bıýroǵa durys málimetterdi berýge tıis. О́z kezeginde nesıelik bıýro ótinish berýshige túzetilgen nesıelik esepti usynýǵa mindetti.
