Aıtys – halyq júreginen oryn alǵan atamura óner. Ǵasyr saıyn jańaryp, dáýirmen birge jasap kele jatqan sóz saıysy ultymyzdyń rýhanı qaınary ispetti. «Altyn dombyraǵa» kelgen kórermenniń kóptiginen Qalıbek Qýanyshbaev atyndaǵy qazaq ulttyq mýzykalyq drama teatrynda ıne shanshar oryn bolǵan joq.
Alǵashqy quttyqtaý sózdi Májilis spıkeri, «Amanat» partııasynyń tóraǵasy Erlan Qoshanov jetkizdi. Ol Prezıdenttiń tól mádenıetimizge qamqorlyq tanytyp, erekshe kóńil bólip otyrǵanyn atap ótti.
«Memleket basshysy aıtysty, ulttyq qundylyqtarymyzdy, ulttyq sportymyzdy barynsha qoldap keledi. О́tkende ǵana Dúnıejúzilik kóshpeliler oıyny joǵary deńgeıde ótti. Budan bólek, bıyldyń ózinde rýhanııatqa eńbegi sińgen biraz uly qaıratkerlerimizdiń mereıtoılaryn atap óttik. Solardyń bárine Prezıdentimiz udaıy qoldaý kórsetedi. Memleket basshysy álemdik saıasatta, jahandyq deńgeıde ultymyzdyń rýhyn asqaqtatyp, memleketimizdiń múddesin, halqymyzdyń namysyn qorǵap júr», dedi E.Qoshanov.
Májilis spıkeri qazirgi ýaqytta qoǵamda Prezıdenttiń «Adal adam – Adal eńbek – Adal tabys» qaǵıdasy ornyǵa bastaǵanyna nazar aýdardy. Alaman aıtystyń da taqyryby osyǵan baǵyttalǵany túpkilikti maqsattan habar beredi.
«Qasym-Jomart Toqaev 2025 jyldy «Jumysshy mamandyqtary jyly» dep jarııalady. Qaı ýaqytta da aqyndar erlik pen eńbekti jyrlaǵan. Shyn máninde, memlekettiń yrys-qutyn, eldiń bereke-birligin shashaý shyǵarmaı ustap turǵan qarapaıym eńbek adamdary ǵoı. Olar týraly qansha márte jyrlasaq ta kóptik etpeıdi dep oılaımyn. Sondyqtan búgingi tórimiz de, sózimiz de eńbek adamdaryna arnalmaq», dedi E.Qoshanov.
О́z kezeginde, aıtys tizginin ustaǵan kórnekti aqyn, Májilis depýtaty Amanjol Áltaı dúbirli dodanyń máni men mańyzyna toqtalyp, qazylar alqasynyń quramy men aqyndar qaýymyn tanystyrdy.
Aıtystyń shymyldyǵyn aqyn, maıdanger, júz jastaǵy Qasymhan Aldabergenov arnaýymen ashyp berdi. Ǵasyr kýágeriniń otty jyry kópshiliktiń kóńilin súısindirdi. 1943 jyly Muhtar Áýezov, Ǵabıt Músirepov syndy qazaqtyń qabyrǵaly jazýshylary men zııaly qaýym ókilderi Abaı atyndaǵy opera teatrynda soǵys kezindegi halyqtyń eńsesin tikteý úshin aıtys ótkizgen bolatyn. Oǵan Kenen, Maıasar, Shashýbaı, Nartaı, Nurlybek syndy birinen biri ótken dúldúlder qatysty. Sol tarıhı aıtystyń túndigin túrip, shymyldyǵyn ashyp bergen 98 jastaǵy qart Jambyl edi. Keshegi sahnaǵa júz jastaǵy Qasymhan ata shyqqan kezde Jambyldyń ózi jarq ete qalǵandaı áser qaldyrdy.
«Kelip turmyn men sonaý,
Bir ǵasyrdyń túbinen.
Jol shegip kúndiz-túnimen,
Arqamda altyn qazyna
Halqymnyń jıǵan júgimen», dep tolǵaǵan qart abyz, sóz sońynda aıtysqa qatysýshy aqyndarǵa batasyn berdi.
Aqsaqal jyryn aıaqtaı bere, elimizdiń ár oblysynan iriktelgen talantty baldyrdyrǵandar dombyrasyn qaqqylap, óleńin áýelete jóneldi. Qazaqtyń baıaǵy saltymen sóz bastap, aǵalary men ápkelerine aqjol tiledi. Sahnada júz jastaǵy aqsaqal men kıiktiń asyǵyndaı kishkentaı balalar jyr aıtyp otyr. О́nerdiń ǵana emes, tutas ómirdiń dıdary edi bul. Halyq osynaý úılesim úlgisine tánti bolyp, qart jyraý Qasymhan ata men jas jyrshylarǵa tikesinen tik turyp qol soǵyp, qurmet bildirdi.
Bıylǵy erejege saı ár jup aqynǵa jeke taqyryp berildi. Taqyryp el ishinde qordalanǵan máselelerge baılanysty tańdalyp alyndy. Ulttyq tárbıe, aýyl sekildi taqyryptarmen qatar qoǵamnyń julynqurtyna aınalǵan lýdomanııa, nashaqorlyq sekildi túıtkildi túıinder de aıtys sahnasynda aıtyldy.
Sóz saıysynyń qorytyndysy boıynsha «Altyn dombyrany» qyzylordalyq Meıirbek Sultanhan jeńip aldy. Bas báıge ıegerine avtokólik kilti tabystaldy. Birinshi oryndy Aqtóbeniń arqaly aqyny Nurbol Jaýynbaev ıelendi. Al ekinshi orynǵa Almatynyń arýy Aıym Asylbekqyzy laıyq dep tanylsa, úshinshi oryndy Ulytaýdan kelgen О́mirjan Kópbosyn, qaraǵandylyq Dıdar Qamı men baıanaýyldyq Aspanbek Shuǵataı ózara bólisti.
Úsh aınalym boıy ushqyrlyq tanytyp, alamannyń aldynan kóringen Meıirbek Sultanhannyń salmaqty sózi, ýáli ýáji kópshilik kóńilin súıispenshilikke bóledi. Elimizdegi kóńil qýantar jaǵdaılardy súıinip jyrlaı da bildi, olqylyqtardy kúıinip synaı da bildi. «Aýyl – altyn besik» taqyrybynda aıtysqan ol keı aýyldyń jadaǵaı jaǵdaıyn tilge tıek ete otyryp, «Manejde ósken baılarym, oılanyńdar, Qazaqta bos besikti terbetpeıdi» dep tógip saldy. Sonan keıin «Memleketimizdiń aldynan aq kún týyp, Álemdik saıası-ekonomıkalyq turǵydan myqty el bolatynymyzǵa úmit etip, «Ekspo-men» shyqpaǵan ataǵyńdy Eksportpen shyǵarar kún týady», dep jyrlady.
Aıtys demeýshisi – kásipker, mesenat, Q4 «Tulpar» kompanııasynyń negizin qalaýshy Talǵat Saqan.
Jyr dodasy ulttyq qundylyqtardy dáriptep, talantty aqyndarǵa qoldaý kórsetýde mańyzdy oqıǵa boldy.
