О́ńir damýyna serpin bergen jobalar

Hromtaýdyń tynys-tirshiligi

Prezıdenttiń jumys sapary Hromtaý qalasyndaǵy «Bolashaq» shahtasyn aralap kórýden bastaldy. Shahtanyń qýaty jylyna 7,5 mln tonna hrom rýdasyn óndirýge jetedi.

Memleket basshysyna jańa nysanda 1 800 jumys orny qurylatyny jónin­de málimet berildi. Tartylatyn ınves­tısııa kólemi 1 trln teńgeden asady.

Eurasian Resources Group dırektorlar keńesiniń tóraǵasy Shýhrat Ibra­gımov «Bolashaq» shahtasy ERG kompanııalar tobynyń iri ınvestısııalyq jobalarynyń biri sanalatynyn atap ótti.

Kásiporyn «Mıllıonnoe» jáne «Almas-Jemchýjına» ken oryndaryn ıgerýmen aınalysady. Ken qazý isine avtomatty rejimde burǵylaıtyn ıntel­lektýaldy burǵylaý qondyr­ǵysy, qashyqtan jer ústinde basqa­rý júıesi, sondaı-aq tolyqtaı avtomat­tandyrylǵan júk kóterý mashınalary sekildi ozyq tehnologııalar men zamanaýı qural-jabdyqtar qoldanylady. Kompanııa basshysynyń aıtýynsha, Dóń taý-ken baıytý kombınatyna qarasty «Bolashaq» shahtasyn iske qosý elimizdiń taý-ken ónerkásibindegi tarıhı oqıǵa bolmaq.

Budan keıin Qasym-Jomart Toqaev Hromtaý joǵary taý-ken tehnıkalyq kolledjine bardy. Prezıdentke bul bilim oshaǵy elimizdiń batys óńirindegi taý-ken salasyna mamandar daıarlaıtyn jalǵyz kásiptik oqý orny ekeni baıandaldy. 1979 jyly negizi qalan­ǵan kolledjde 1 157 stýdent kenshi, uńǵylaýshy, ken baıytýshy, slesar, taý-ken elektr mehanıgi, elektr monteri jáne basqa da mamandyqtar boıynsha bilim alyp jatyr.

Oqý ornynyń dırektory Baǵdash­jan Moldasheva Memleket basshysyna bilim berý úderisinde qoldanylatyn ozyq tehnologııalar jóninde máli­met berdi. Atap aıtqanda, kolledj­de teorııalyq bilimdi tájirıbe­men ushtastyratyn dýaldy oqytý júıesi engizilgen. Stýdentter kolledj aýmaǵyndaǵy oqý-shahta polıgonynda óndiristik tájirıbeden ótip, tehnıkamen jumys isteýdiń kúrdeli ádis-tásilderin meńgeredi. Sondaı-aq jattyqtyrýshy-sımýlıatorlar arqyly shahtadaǵy jaǵdaıǵa barynsha uqsas ortada jumys daǵdylaryn úırenedi.

Qasym-Jomart Toqaev kolledj jumysymen tanysqannan soń stýdenttermen jáne túlektermen kezdesti. Áńgimelesý barysynda Memleket basshysy dýaldy oqytý júıesiniń asa qajet ekenin jetkizip, atalǵan kolledjdegi teorııa men óndiristi ushtastyrý arqyly júrgizilip kele jatqan bilim berý isine joǵary baǵa berdi.

Prezıdent taý-ken salasy el ekonomıkasynyń mańyzdy bóligi ekenine toqtaldy. Qasym-Jomart Toqaevtyń aıtýynsha, «Jumys­shy mamandyqtary jyly» bolyp jarııalanǵan 2025 jyly otan­dyq ónerkásipti qoldaýǵa basa nazar aýdarylady.

Memleket basshysy aralap kórgen kelesi jer – №1 Hromtaý orta mektebi. Qasym-Jomart Toqaev mekteptiń bilim berý isindegi erekshelikterimen jáne oqýshylardyń zerthanalyq jumystarymen tanysty.

Prezıdentke bul oqý ordasy «Aqtóbe oblysynyń shaǵyn jınaqty aýyl mektepteriniń áleýetin sıfrlyq tehnologııalardy qoldana otyryp damytý» qanatqaqty jobasyna engizilgeni jóninde aqparat berildi.

Qanatqaqty joba shaǵyn jınaqty mektepterde sıfrlyq tehnologııalardy qoldaný arqyly bilim berýdiń sapasy men oqytýdyń tıimdiligin arttyrýǵa baǵyttalǵan. Joba aıasynda muǵalimder qashyqtan tájirıbe almasady.

Memleket basshysy atalǵan bilim oshaǵyndaǵy jáne basqa da aýyl mektepterindegi oqýshylardyń ashyq sabaǵyna onlaın-rejimde qatysty.

Budan keıin Qasym-Jomart Toqaev shalǵaı eldi mekenderde turatyn balalardyń bilim alýyna qolaıly jaǵdaı jasaý úshin mektepke avtobýs syıǵa tartty.

Aımaq ekonomıkasynyń bıylǵy ósimi – 6 paıyz

Sonymen qatar Memleket basshysy Aqtóbe qalasyndaǵy bolat qubyrlaryn shyǵaratyn zaýyttyń jumysymen tanysty. Kásiporyn jylyna 20 myń tonna ónim óndiredi. Quny 3,5 mlrd teńge bolatyn nysan bıyl shilde aıynda paıdalanýǵa berilgen. Zaýyt quryltaıshysy Mırǵalı Býrbaevtyń aıtýynsha, qazir óndiris ornynda qubyrlardy, metall ázirlemelerin daıyndaıtyn qondyrǵylar iske qosylǵan.

Prezıdentke zaýytty damytýdyń uzaqmerzimdi jospary baıandaldy. Kásiporyn aldaǵy ýaqytta shyǵary­latyn ónim túrlerin kóbeıtip, sehtar­dyń qýatyn arttyrýdy kózdep otyr.

Sonymen qatar Qasym-Jomart Toqaev jergilikti taýar óndirýshilerdiń kórmesin aralady. Kórmege óndiris jáne temirjol salasyna arnalǵan jabdyqtar, sondaı-aq medısınalyq qondyrǵylar men dári-dármekter, arnaıy kıimder, turmystyq hımııa, santehnıka buıymdaryn shyǵaratyn kásiporyndardyń ónimderi qoıylǵan.

Budan keıin Prezıdentke Aqtóbe oblysynyń ákimi Ashat Shaharov óńirdiń áleýmettik-ekonomıkalyq damýy týraly baıandady.

Oblys basshysynyń aıtýynsha, bıylǵy 11 aıda aımaq ekonomıkasynyń ósimi 6 paıyzdy quraǵan. Al ónerkásip óndirisi 4 paıyzǵa artyp, osy jyldyń alty aıynda shetelden tartylǵan tikeleı ınvestısııa kólemi 175 mln dollarǵa jetken.

Prezıdentke Aqtóbe qalasy­nyń áýejaıyn mýltımodaldy hab retinde damytý úshin munda arnaıy ekonomıkalyq aımaq qurylatyny jóninde málimet berildi. Bul jobaǵa 1,2 trln teńgeden asa ınvestısııa tartyp, 5 myń jumys ornyn ashý josparlanǵan.

Oblys ákimi Memleket basshysyna óńirde júzege asyrylyp jatqan jáne 2025–2027 jyldarǵa josparlanǵan ınvestısııalyq jobalar týraly da aıtty.

Sonymen qatar Qasym-Jomart Toqaevqa Aqtóbe qalasynda salynatyn jańa qurylys nysandarynyń maketi tanystyryldy. Prezıdent tapsyrmasyna saı, shaharda 700 oryndyq drama teatry jáne 35 myń kórermenge arnalǵan kópfýnksıonaldy stadıon boı kótermek.

Memleket basshysy kelesi kezekte Aqtóbe qalalyq polısııa depar­tamentiniń jedel basqarý ortalyǵynyń ǵımaratyn aralap kórdi.

Nysan óńirdegi 15 myńǵa jýyq beınekamera arqyly jergilikti jerdegi ahýaldy naqty ýaqyt rejiminde táýlik boıy baqylaýǵa múmkindik beredi. Ortalyqtyń jedel zalynda 32 ınspektor men «102» shuǵyl jelisiniń 3 operatory jumys isteıdi.

Qasym-Jomart Toqaevqa Ishki ister mınıstriniń orynbasary Sáken Sársenov polısııa qyzmetinde qoldanylyp jatqan sıfrlyq jobalar týraly baıandady.

Qazir Aqtóbe oblysynda 5 jedel basqarý ortalyǵy jumys istep tur. Osy ortalyqtar arqyly óńirde 1,8 myń qylmystyq quqyq buzýshylyq ashylyp, 187 myń jol júrý erejesin buzý faktisi anyqtalǵan.

Sonymen qatar Prezıdentke ishki ister organdary qyzmetiniń tıimdiligin arttyrý úshin jasandy ıntellekt tehnologııasy qoldanyla bastaǵany týraly málimet berildi. Atalǵan tehnologııa baqylaý kameralaryndaǵy beınege taldaý júrgizip, joǵalyp ketken azamattardy tabýǵa kómektesedi. Sondaı-aq arnaıy platformaǵa júktelgen fotosýretter arqyly kúdiktilerdiń bet-beınesin tanyp, qajetti málimetterdi de usynady. Budan bólek jol júrý erejesin buzý faktilerin tirkep, kólik qozǵalysyn qadaǵalaýǵa járdemdesedi.

Memleket basshysy osy baǵyttaǵy jumysty jalǵastyrý qajet ekenin aıtyp, qoǵamda zań men tártiptiń ústem­digin qamtamasyz etýdiń mańyzyna nazar aýdardy.

Sonymen qatar Prezıdent Aqtóbe oblystyq perınataldyq ortaly­ǵynyń qyzmetimen tanysty.

Medısınalyq nysanda jylyna 8 200 náreste dúnıege kelip, 13 myńnan asa adam em alady. Sonymen qatar «Ańsaǵan sábı» jobasy aıasynda jylyna 130 EKU jasalady. Al erte aralasý ortalyǵynda 200 bala ońaltý sharalarymen qamtylady.

Prezıdentke ortalyqta týa bit­ken syrqaty bar nárestelerge 50 kar­­­dıo­hırýrgııalyq jáne oftal­mo­­logııalyq ota jasalǵany týraly máli­met berildi. Ortalyq ashylǵanǵa deıin mundaı dıagnozy bar sábıler Astana qalasynda emdelgen.

Qasym-Jomart Toqaevqa mekeme­de jyl basynan beri júzege asyrylyp jatqan «Bir kúndik klınıka» jobasy tanystyryldy. Atalǵan bastama qanmen beriletin aýrýlardy erte bastan anyqtaýǵa kómektesedi. Osy joba aıasynda búginge deıin 6 myń áıel medısınalyq tekserýden ótken.

Memleket basshysy mekeme qyz­metkerlerimen áńgimelesip, olardyń jumysyna tabys tiledi.

Buǵan qosa Prezıdent Aqtóbe qalasyndaǵy «Hımık» stadıonynyń bazasynda ashylǵan balalar fýtbol akademııasyna bardy.

Zamanaýı úlgide jabdyqtalǵan nysanda jyl boıy sportpen aınalysýǵa jaǵdaı jasalǵan. Akademııada qazir 780 bala úzdik halyqaralyq tájirıbe boıynsha jattyǵady. Onda sport zaldary, ákimshilik, ońaltý, em-dom jáne basqa da qyzmet kórsetý kabınetteri ornalasqan.

Memleket basshysy akademııa­ny aralap kórip, jasóspirimdermen jáne jattyqtyrýshylarmen áńgimelesti. Qasym-Jomart Toqaev balalardy zııan­dy áreketterden saqtaý úshin olardy sportqa kóptep tartýdyń mańyzy zor ekenin aıtty.