Sýret: Bloomberg
«Tesla», «Skype» jáne «SpaceX» sııaqty alpaýyttardyń ınvestory Tım Dreıper osy startapqa 1 mln dollar kóleminde ınvestısııa quıýǵa daıyn. Kásipkerdiń jalǵyz sharty – kompanııa 2024 jyldyń sońyna deıin 300 myń dollar kóleminde tabysqa jetip, ishki naryqta suranysqa ıe ekenin dáleldeýi kerek.
«TrustMe» – Sılıkon alqabyndaǵy akselerator nusqasy boıynsha álemdegi eń úzdik 10 startap qataryna engen, SMS arqyly 90 sekýndta mańyzdy kelisimsharttarǵa qol qoıýǵa múmkindik beretin «TrustContract» qyzmetin usynatyn, 2 000-nan astam kompanııaǵa kómektesip úlgergen kompanııa. Bul bastamanyń ekologııaǵa áseri týraly da aıtpaı ketpeske bolmas. О́ıtkeni qaǵaz shyǵynyn azaıtý – tehnologııa men ekologııalyq tıimdilik turǵysynan óte mańyzdy shara.
«Shotymda jetkilikti aqsha bolǵan kezde IT salasynda ózimdi synap kórgim keldi. Tehnologııalar arqyly qoǵamǵa paıdamdy tıgize alatynymdy túsindim. Osylaısha, adamdar men kompanııalar ózara árekettesken túrli mekemeler týraly shynaıy pikir qaldyra alatyn ekojúıe – «TrustMe» tujyrymdamasyn oılap taptym. Kastdev ótkizdik, gıpotezamyz rastaldy jáne ónim jasaýǵa kiristik. «TrustContract» bıznes-úderisterdi jaqsartýdy ǵana emes, sonymen qatar barlyq zańdy talaptarǵa saı tolyq qaýipsizdikti qamtamasyz etedi. Bul – kishigirim kásipten úlken kompanııalarǵa deıin paıdaly resýrs. Qazir árbir azamattyń qoldaýy – otandyq tehnologııalardyń álemdik arenada da moıyndalýyna úlken kómek», deıdi «TrustMe» servısiniń negizin qalaýshy Shyńǵys Dáýletbaev.
Jeke kapıtaly 2 mlrd dollarǵa baǵalanǵan Tım Dreıper búkil salalarǵa áser ete alatyn startaptardy izdeıdi. «Onyń ınvestısııa quıýy – tek qarjylyq qoldaý emes, bir jaǵynan startaptyń sapasy men áleýetin moıyndaý», deıdi kompanııa ókilderi.
Shyńǵystyń aıtýynsha, basty klıentteri – shaǵyn jáne orta bıznes sýbektileri. Tarqata aıtqanda, kólik tasymaly, saýda-sattyq, týrızm, taǵy basqa baǵyttar. Qazir elimizde shamamen bir jarym mıllıon jeke kásipker men 600 myń kompanııa bar, sonyń arasynan 700 sýbekti – «TrustContract» klıentteri. Kúnine 200 kompanııa osy platformany paıdalanyp, qol qoıady. Qazirge deıin «TrustContract» kómegimen 100 myńnan astam kelisimshart jasalǵan.
