Kollajdy jasaǵan Amangeldi Qııas, «EQ»
Pıramıdalardan tóngen qaýiptiń aýqymdylyǵy sonshalyq, bul keselmen kúres máselesi Prezıdentke deıin jetti. Memleket basshysy Qasym-Jomart Toqaevtyń osydan eki jyl buryn Qazaqstan polısııasynyń 30 jyldyǵyna arnalǵan saltanatty jıynda sóılegen sózinde quqyq qorǵaý organdarynyń áleýetin alaıaqtyq, qarjylyq pıramıdalar qurý, kapıtal men resýrstardy shetelge zańsyz shyǵarý faktilerine barynsha jumyldyrý qajettigin aıryqsha atap ótti. Al «Qarjy monıtorıngi agenttigi kóleńkeli ekonomıkamen kúresetin negizgi memlekettik organǵa aınalýǵa tıis», degen edi sol jıynda Prezıdent.
Sondaı-aq Memleket basshysy bıylǵy 2 qyrkúıektegi «Ádiletti Qazaqstan: zań men tártip, ekonomıkalyq ósim, qoǵamdyq optımızm» atty Qazaqstan halqyna Joldaýynyń «Qoǵamda zań men tártip ıdeologııasyn tereń ornyqtyrý qajet» degen baǵytynda sıfrlyq tehnologııalardyń kúndelikti ómirimizge jappaı enýi túrli alaıaqtyqtyń kóbeıýine ákep soqtyryp otyrǵanyna toqtaldy.
«Qazir qarjy jáne ekonomıka negizderin bilý, qarapaıym sıfrlyq daǵdylardy meńgerý asa mańyzdy bolyp tur. Osy rette «Amanat» partııasy usynǵan «Qaryzsyz qoǵam» jobasyn atap ótkim keledi. Azamattardyń qarjylyq saýatyn arttyrýǵa arnalǵan osy jobaǵa byltyr 65 myń adam qatysty. Al bıyl odan da kóp adam qatysady», dedi Prezıdent.
Buǵan qosa Memleket basshysy mektepterde, joǵary oqý oryndarynda qarjylyq jáne sıfrlyq saýattylyq negizderin úıretetin bilim baǵdarlamasyn engizý qajettigin de tapsyrdy.
«Bul jumysty Úkimet qarjy salasyn retteý organdarymen birge atqarýy kerek. Munyń bári azamattarymyzdyń ártúrli alaıaqtyń quryǵyna túsip qalmaýyna múmkindik beredi. Quzyrly organdardyń bári zańǵa baǵynatyn jurtqa zardabyn tıgizip jatqan alaıaqtyqqa jáne sol sııaqty basqa da zańsyz áreketterge qarsy batyl sharalar qabyldaýǵa tıis», dep Prezıdent Qasym-Jomart Toqaev osy baǵyttaǵy tapsyrmasyn shegeleı tústi.
Osyǵan baılanysty búginde Joldaýdan ózine júkteme alǵan quzyrly organdar áreketsiz otyrǵan joq deýge bolady. Máselen, jyl basynan beri QMA 20 mlrd teńgeden asa shyǵyny bar qarjy pıramıdalaryn qurý jáne basqarý faktileri boıynsha 68 qylmystyq isti tergep, aıaqtady. Qazirgi ýaqytta 13 mlrd teńgeden asa qarajat óteldi.
Bul týraly QMA men Joǵary bilim jáne ǵylym mınıstrligimen birlesip, elimizdiń 100-den asa joǵary oqý oryndary úshin uıymdastyrylǵan quqyqtyq mádenıet jáne qarjylyq saýattylyqty arttyrý jónindegi vebınar barysynda belgili boldy. Is-shara «Tártipti ózińnen basta!» estafetasy aıasynda ótkizildi.
Agenttikte alaıaqtyq jobalardyń ómirlik sıklin jáne olarǵa tartylǵan salymshylar sanyn qysqartýǵa baǵyttalǵan «Qarjy pıramıdalaryna qarsy is-qımyl» arnaıy jobasy engizildi. Joba aıasynda osy jyldyń basynan beri ınternet keńistiginde 47 qarjy pıramıdasy anyqtaldy. Áleýmettik jelilerde olarǵa qatysty 300-ge jýyq chat jabyldy. Olardyń shamamen 2 mıllıonǵa jýyq qatysýshysy – áleýetti salymshylary bolǵan.
Bıyl áleýmettik jelilerdi taldaý nátıjesinde qarjy pıramıdasy belgileri bar saıttarǵa qatysty 11,7 myńnan asa silteme buǵattaldy.
Osy oraıda agenttikte qarjy pıramıdalarynyń belgilerin tekserýge múmkindik beretin «Baiqa, piramida!» Telegram-boty iske qosylǵanyn aıta ketken jón. QMA mamandary eger siz nemese jaqyndaryńyz qarjy pıramıdasynyń áreketine tap bolsa, turǵylyqty jerińiz boıynsha Ekonomıkalyq tergep-tekserý departamentine júginýdi suraıdy.
