foto: vıdeodan kadr
Polısııanyń málimetinshe, 10 jeltoqsanda Nurymov buzaqylyq jasady jáne kólik qozǵalysyna kedergi keltirdi degen aıyppen ustalǵan.
«Ol qoǵamdyq orynda jáne polısııa qyzmetkerlerine ádepsiz sózder aıtyp, pyshaqpen qorqytyp, bótenniń múlkine qasaqana zııan keltirgen. Sondaı-aq is-áreketin toqtatpaı, aınalasyndaǵylarǵa, onyń ishinde kámeletke tolmaǵandarǵa qaýip tóndire otyryp, azamattardyń qoǵamdyq tártibi men tynyshtyǵyn buzýdy jalǵastyrǵan. Buzaqylyq faktisi boıynsha sot oǵan 15 kúndik ákimshilik qamaýǵa alýdy taǵaıyndady», dedi polısııa.
Bul rette polıseıler bótenniń múlkine qasaqana zııan keltirý faktisi boıynsha qylmystyq is qozǵady.
«10 jeltoqsanda Eńbekshiqazaq aýdany, Azat aýylynda bolǵan zańsyz áreketterdiń saldarynan avtokólik ıesine ákimshilik jaýapkershilik sheginen aıtarlyqtaı asyp túsetin jáne qylmystyq saralaýǵa ákep soǵatyn materıaldyq zalal keltirilgeni anyqtaldy. Qazirgi ýaqytta oqıǵanyń barlyq mán-jaıyn anyqtaý maqsatynda jan-jaqty, tolyq jáne obektıvti tergeý amaldary júrgizilip jatyr», dedi polısııa.
Polısııanyń málimetinshe, 10 jeltoqsan kúni saǵat 15:30-da Azat aýylynda jerleý rásimi kezinde «qoǵamdyq tártipke jáne basqalardyń, sonyń ishinde kámeletke tolmaǵan balalardyń qaýipsizdigine qaýip tóndiretin» oqıǵa bolǵan.
Esterińizge sala keteıik, Qarjaýbaı Nurymovtyń otbasyndaǵy jantúrshigerlik oqıǵalar tizbegi qazannyń 4-ine qaraǵan túni onyń kóz aldynda 16 jastaǵy uly Sherzat Bolatty aıaýsyz óltirgennen keıin bastalǵan bolatyn.
Qylmys jasady degen kúdikpen 11 adam ustalyp, ýaqytsha qamaýǵa alyndy. Kisi óltirýdi tergeýdi Qazaqstannyń Ishki ister mınıstri Erjan Sádenov qolǵa aldy.
Birneshe kúnnen keıin, 12 qazanǵa qaraǵan túni Azat aýylynda Sherzat Bolattyń otbasynyń úıi órtendi. Bas prokýratýra úıdi órtep jibergen jaýaptylardy tabýǵa ýáde bergenimen, búgingi kúnge deıin kináliler tabylmaı otyr.
9 jeltoqsanda Sherzat Bolattyń aǵasynyń máıiti tabyldy. Aldyn ala málimet boıynsha, er adam ózine qol jumsaý týraly hat qaldyryp, sýısıd jasaǵan.
