Ol - Shyǵys Qazaqstannyń týmasy. О́skemende ósip, eńbek jolyn da osynda bastaǵan. Ár jyldary týrızm, dene shynyqtyrý jáne sport basqarmasynda, aýyl sharýashylyǵy mınıstrliginde qyzmet atqardy. Ulan aýdany apparatynyń basshysy, Aıagóz aýdany ákiminiń orynbasary, ShQO Energetıka jáne turǵyn úı-kommýnaldyq sharýashylyq basqarmasynyń basshysy boldy. Sońǵy eki jylda Kúrshim aýdanynyń ákimi laýazymynda jumys istedi. Eńbek ótili 14 jyldy quraıdy, onyń 12 jyly memlekettik qyzmette ótti. Sondaı-aq Almat Talǵatuly Prezıdenttik jastar kadrlyq rezerviniń múshesi, onyń óńirlerdi damytý salasy boıynsha magıstrlik dárejesi de bar.
Shyǵys Qazaqstan oblysynyń ákimi Ermek Kósherbaev Almat Aqyshovtyń ekonomıka, energetıka jáne turǵyn úı-kommýnaldyq sharýashylyq salasyndaǵy mol tájirıbesin eskerip, oǵan oblys ortalyǵynyń áleýmettik-ekonomıkalyq kórsetkishterin damytýdy qamtamasyz etýde zor jaýapkershilik artylatynyn atap ótti.
Aımaq basshysy jańa taǵaıyndalǵan ákimge ekologııa men kóshelerdi jaryqtandyrý máselelerin nazarǵa ala otyryp, qalany odan ári damytý boıynsha usynystar ázirleýdi tapsyrdy. Sonymen qatar ekonomıka, qurylys, abattandyrý jáne áleýmettik saladaǵy mańyzdy jobalardy aıaqtaýdy júktedi.
Týrıstik áleýetti arttyryp, oblys ortalyǵynyń kelbetin jaqsartý úshin bıznes nysandardyń biryńǵaı dızaın-kodyn engizý týraly usynystar daıyndaý tapsyryldy.
Sondaı-aq oblys ákimi qalanyń mańyzdy ári serpindi jobalaryn júzege asyrý úshin ınvestorlardy tartyp, osy jáne basqa da tapsyrmalar jóninde tıisti jol kartasyn daıyndap, tez arada bekitýge usynýdy júktedi.
«Qala turǵyndary óz aýyzbirshiligin kórsetip, О́skemenniń ózekti máselelerin sheshýge belsene atsalysady dep oılaımyn», dedi Ermek Kósherbaev.
