Konferensııany Týrızm jáne sport mınıstriniń orynbasary Serik Jarasbaev ashyp, Qarataı Turysovtyń 90 jyldyq mereıtoıy Parlamentte, Almatydaǵy Qanysh Sátbaev atyndaǵy Ulttyq tehnıkalyq ýnıversıtette, Jambyl oblysynda saltanatty túrde atalyp ótkenin, eńbek jolyn qarapaıym geolog bolyp bastap, keńes odaǵy deńgeıinde laýazymdy qyzmetter atqarǵan tulǵanyń ónegeli ǵumyry ǵıbratqa toly ekenin jetkizdi.
Memleket jáne qoǵam qaıratkeri Qýanysh Sultanov «El aǵasy» degen taqyrypta baıandama jasap, elimizdegi táýelsizdikke deıingi hám táýelsizdikten keıingi saıası úrdisterdi Qarataı Turysovsyz elestetý múmkin emestigin, qarapaıym ǵana aýyl balasynyń keńes odaǵynyń astanasy Máskeýge baryp oqyp, Qanysh Sátbaev sekildi geolog bolyp oralǵany, jer qoınaýynda jatqan baılyqty el ıgiligine jaratýǵa bar kúsh-jigerin jumsaǵany týraly ónegege toly áńgimesin aıtty.
«Qarataı Turysov aǵamyzdyń búkil ómiri – urpaqqa ónege. Ol kisiniń ómirden ozǵanyna jıyrma jyl bolsa da, eli bir sátke umytyp, esinen shyǵarǵan joq. Qarekeńniń esimi memorıaldyq taqtalarda jazylyp, birneshe qalanyń kóshelerine, joǵary oqý oryndarynyń kafedralaryna aty berilip jatyr. Nege? Qarataı aǵamyz – Qanysh Sátbaevtan keıin 3 myń shaqyrym joldy jaıaý kezip, Jezqazǵan dalasyn sharlap shyqqan geolog. Ol kisiniń sol eńbegin búkil Arqa jurty biledi. Torǵaı dalasynyń halqy aǵamyzdy qalaı qurmetteıtinine talaı márte kýá boldyq», deıdi Q.Sultanov.
Jıyn spıkerleri Qarataı Turysov geologııa salasyndaǵy ónimdi eńbegi arqyly kózge túsip, 29 jasynda Qarajal qalalyq partııa komıtetiniń birinshi hatshysy bolyp saıası qyzmetke kelgenin, qaıratker tulǵa satylaı ósip, Torǵaı oblystyq partııa komıtetiniń hatshysy, Respýblıka ónerkásip baqylaý komıteti tóraǵasy, Qazaqstan kásipodaqtary tóraǵasy, Qazaqstan Kompartııasy Ortalyq komıteti ónerkásip hatshysy, Búkilodaqtyq kásipodaq komıtetiniń hatshysy qyzmetterin abyroımen atqarǵanyn, sol kezdegi respýblıka basshysy Dinmuhamed Qonaev Turysovtyń bilimi men biligin joǵary baǵalaǵanyn, Búkilodaqtyq kásipodaq komıtetiniń hatshysy qyzmetinde júrip, Birikken Ulttar Uıymynyń minberinen keńes odaǵynyń atynan sóılegen tuńǵysh qazaq ta osy Qarataı Turysov ekenin jetkizdi.
Abaı atyndaǵy Memlekettik syılyqtyń laýreaty, Qazaqstannyń eńbek sińirgen qaıratkeri, qalamger Saýytbek Abdrahmanov «Qarataı Turysov – memleket qaıratkeri» taqyrybynda baıandama jasady. Baıandamada qalamger Qarataı Turysovtyń tulǵasyn keń masshtabta baǵalaý kerektigine toqtaldy. Qarataı Turysov 250 mıllıon halqy bar, álemniń 1/6 bóligin alyp jatqan keńes odaǵy atty sosıalıstik memlekettiń saıası tulǵasy bolǵanyn, Qarataı Turysov keńes odaǵy deńgeıinde laýazymdy qyzmet atqarǵan Turar Rysqulovtan keıingi ekinshi qazaq ekenin, mundaı laýazymǵa túrki balasynan sanaýly azamattar ǵana qol jetkizgenin, Qarataı Turysovtyń iskerligine ádil baǵany ekonomıka ǵylymdarynyń doktory, KSRO Mınıstrler Keńesi tóraǵasynyń orynbasary Leonıd Abalkınniń bergenin aıtty.
«Qazaq balasy úshin Qarataı Turysovtyń 1987 jyly Birikken Ulttar Uıymy minberinen sóılegende, jer taǵdyryn, ekologııa kesapatyn, ıadrolyq polıgon máselesin kótergeni, sol jyly AQSh pen KSRO arasynda ótkizilgen alǵashqy telekópir júzdesýde kommýnıstik mınıstrler aýyz asha almaı qalǵan sátte Keńes odaǵy Joǵarǵy keńesiniń depýtaty retinde amerıkalyq kongressmendermen pikirtalasqa túsip, óz oıynan taısaqtaı ashyq aıtqany bul kúnge ańyzǵa aınalǵan. Týǵan halqy úshin mańdaı terin tógip, artynda ańyz qaldyrǵan saıası tulǵanyń esimin ulyqtaý urpaqqa mindet dep bilemiz», deıdi qatysýshylar.
Qarataı Turysov Qazaq eliniń tuńǵysh Týrızm, dene shynyqtyrý jáne sport mınıstri, Qazaqstan Respýblıkasy Ortalyq saılaý komıssııasynyń, Parlament Májilisiniń Qarjy jáne bıýdjet komıtetiniń tóraǵasy bolǵan jyldardaǵy eńbegi haqynda memleket jáne qoǵam qaıratkeri Qylyshbek Izbasqanov, Halyqaralyq televıdenıe jáne radıo akademııasynyń akademıgi, «Daryn» Memlekettik jastar syılyǵynyń laýreaty, qoǵam qaıratkeri Mahat Sadyq, Dene shynyqtyrý jáne sport boıynsha respýblıkalyq oqý-ádistemelik jáne taldaý ortalyǵynyń dırektory Qydyrbek Rysbek syndy azamattar maǵynaly estelik aıtty.
