Esirtkige esi ketkenderdi tyıym salynǵan saıttarǵa shaqyratyn zańsyz jarnama taratýmen aınalysqandar QR QK-niń 299-1-babyna sáıkes, qylmystyq jaýapkershilikke tartylady. Jymysqy áreketin júzege asyrýdyń túrli jolyn meńgergen aılakerler mundaı las iske jastardy tartatyn bolǵan. О́kinishke qaraı, oń-solyn tanymaǵan jastar ońaı oljaǵa kenelem dep opyq jep jatady. Olardy mundaı keleńsizdikten saqtandyrý maqsatynda tıisti oryndar tarapynan úgit-nasıhat jumystary júrgizilip jatyr. Al jymysqy jazbalarmen kúres máselesi – jyl on eki aı toqtamaıtyn sharýalardyń tiziminde.
Almaty qalasy Jastar saıasaty basqarmasy men Polısııa departamentiniń Esirtki qylmysyna qarsy is-qımyl basqarmasy qala ǵımarattaryna jazylǵan esirtki jarnamalaryn joıýǵa baǵyttalǵan kezekti «Narkostop» aksııasyn ótkizdi. Quzyrly oryn qyzmetkerlerine erikti jastar kómekke kelgen. Atap aıtqanda, aksııaǵa 500-ge jýyq volonterler, stýdentter jáne komıýnıtı ortalyqtardyń rezıdentteri qatysty. Olar Almaty qalasynyń Polısııa departamentiniń qyzmetkerlerimen birge esirtki jarnamalarynyń oryndaryn anyqtap, olardyń zańsyz jazbalaryn óshirdi. Reıd barysynda bir kúnniń ishinde ǵımarattardyń syrtqy qabyrǵasyna jazylǵan 100-den asa jarnama anyqtalyp, joıylǵan.
«Zamandastaryma esirtkiniń zııan ekenin túsindire otyryp, salamatty ómirdi tańdaýǵa shaqyrýdy azamattyq mindetim dep sanaımyn. Búgin Almaty qalasynyń volonterleri jastar úshin mańyzdy «Narkostop» aksııasyna qatysýǵa keldik. Almaty – bizdiń ortaq úıimiz, sondyqtan is-shara aıasynda zańsyz jarnamalardy óshirip, olardyń ári qaraı taralmaýyna az da bolsa óz úlesimizdi qosyp jatyrmyz», deıdi volonter Amanǵazy Nurasyl.
Esirtki qylmysyna qarsy is-qımyl basqarmasyndaǵylardyń aıtýynsha, jyl basynan beri «Narkostop» jobasyna qala boıynsha 3 myńnan asa volonter qatysqan. Joba aıasynda 60-tan asa is-shara ótip, 2 myń trafaret pen graffıtı óshirilgen. Sonymen qatar qaladaǵy komıýnıtı ortalyqtarda nashaqorlyqqa qarsy mádenıetti qalyptastyrýǵa jáne esirtki aınalymyna qarsy qoǵamdyq kúreske baǵyttalǵan túsindirme jumystary, ıntellektýaldyq oıyndar, debattar, vıktorınalar men kýızder júıeli túrde ótip keledi.
Qalada nashaqorlyqqa qarsy kúres aıasynda jergilikti atqarýshy organdar, quqyq qorǵaý vedomstvosynyń ókilderi, qoǵam belsendileri men eriktiler birlesip jaz ben kúz aılarynda 3 myń adamdy qamtıtyn 23 is-shara uıymdastyrǵan. Solardyń biri – jasóspirimderdiń ata-analary men Túrksib aýdanynyń ıývenaldy polısııa ınspektorlary úshin «Kepilgerlermen kezdesken jaǵdaıda qaýipsizdik sharalary» taqyrybynda ótken sheberlik sabaǵy. Sondaı-aq qalanyń Medeý, Áýezov, Jetisý aýdandary aýmaǵynda da Almaty qalasy polısııa departamentiniń esirtki qylmysyna qarsy is-qımyl basqarmasymen birlesip esirtki quraldaryn taratýmen aınalysatyn saıttardyń syrtqy jarnamasynyń graffıtıin anyqtaýǵa baǵyttalǵan aksııaǵa qatysýǵa zeınetkerler de nıet bildirgen.
«О́tken jyly júrgizgen saýalnama nátıjesinde jastardyń 10%-y ómirinde bir ret bolsa da sıntetıkalyq esirtki qabyldaǵany anyqtalǵan edi. Sıntetıkalyq esirtkini paıdalanýshylar áleýmettik toptarǵa bólinbeıdi. Al jalpy bul – álemdik deńgeıdegi qaýipti úrdis. Biz esirtki qylmysymen qoǵam bolyp kúresýimiz kerek», deıdi Almaty qalalyq Jastar saıasaty basqarmasynyń ókilderi.
Almaty qalasyndaǵy Psıhıkalyq densaýlyq ortalyǵynyń derekterine súıensek, 2024 jyldyń shilde aıynda «nashaqorlyq» dıagnozymen dıspanserlik esepte 1 154 adam tirkelgen. Onyń 180-i áıel adam bolsa, jeteýi – kámelet jasyna tolmaǵandar. Mamandardyń aıtýynsha, esirtkige shatylǵandardyń sany resmı statıstıkadan áldeqaıda kóp. Al olardyń qalypty ómirge qaıta qadam basýyna qoǵam bolyp qoldaý kórsetýdiń mańyzy zor.
ALMATY
