Sáýir aıynan beri júrgizilgen aksııaǵa oblysta 173 myńnan astam turǵyn, 4 myńnan astam mekeme men kásiporyn qatysty. 77 myńnan astam aýla, 2508 kóp qabatty turǵyn úı, 74 myń jeke turǵyn úı, 300-ge jýyq saıabaq abattandyryldy.
– «Taza Qazaqstan» aksııasy tek tazartý emes, saý ekologııalyq sana qalyptastyrýdyń bir qadamy. Bataly iske balalarymen birge qatysqan ata-analar óz eliniń tazalyǵyna qamqorlyq jasap, bolashaq úshin asa mańyzdy qundylyq qalyptastyrady. Kósheden bastalǵan kórneki is keleshekte qorshaǵan ortany saqtaıtyn jańa urpaqty tárbıeleıdi», deıdi oblystyq «Jasyl el» jastar eńbek jáne qurylys jasaqtary shtabynyń jetekshisi Qasıet Balmolda.
Ekologııalyq aksııa oblysta sáýir aıynan bastalyp, apta saıyn ótti. Abattandyrý, sanıtarlyq-tazalaýdy qamtıtyn oblystyq naqtyly is-sharalar jospary bekitildi. Bıyl óńir alapat sý tasqynyn bastan keshirdi. Tabıǵı qubylystan keıingi ózen arnalary men aýmaqtaryn qoqystan tazalaý maqsatynda shilde, tamyz aılarynda «Taza jaǵalaý» aksııasy uıymdastyryldy. Qyrkúıek aıynda «World cleanup day», búkilálemdik tazalyq kúni aksııasy ótti.
– Sáýir aıynan beri uıymdastyrylǵan sanıtarlyq tazalyq jumystary barysynda 6 myńnan astam trotýar jóndeldi, 63 myńnan astam túrli aǵash kósheti egildi, 1221 áleýmettik nysan, 1251 tarıhı-mádenı eskertkish tazartyldy. Ekologııalyq aılyqqa 1805 tehnıka jumylyp, 61 750 tonna qoqys shyǵaryldy, – deıdi oblystyq qoǵamdyq damý basqarmasy jastar saıasaty bóliminiń bas mamany Asylaı Altaıqyzy.
«Ǵarysh sapary» mekemesi oblys aýmaǵynan 197 zańsyz qoqys ornyn anyqtaǵan edi. Búginge deıin onyń 149-y joıyldy. Qalǵan qoqys oryndary da tazartylady deıdi mamandar.
Respýblıkalyq aksııanyń óńirde ótý barysy týraly buqaralyq aqparat quraldarynda da únemi jarııalanyp, kópshilik ýaqtyly habarlanyp otyr. Máselen, oblystyq gazet betterinde 171 maqala, jergilikti telearnalarda 103 sıýjet, ınternet-resýrstarda 159 materıal, áleýmettik jelilerde 1300-den astam jazba, 130-dan astam beınerolık daıyndalǵan.
Qoǵamdyq oryndardy lastap, qorshaǵan ortaǵa zııan keltirgen mekeme men adamdardy zańǵa tartyp otyrý da kerek. Bıyldyń ózinde óńirde Ákimshilik quqyq buzýshylyq týraly kodekstiń 434-2, 505-baptaryna sáıkes 10 002 quqyq buzýshylyq anyqtalǵan. Nátıjesinde jaýapty tulǵalarǵa 71 658 560 teńge kóleminde aıyppul salyndy. Onyń 33 065 596 teńgesi óndirildi.
Aksııa oblystyń barlyq aýdanyn qamtydy. Aıtalyq, jaqynda ǵana Jańaqala aýdandyq máslıhatynyń depýtaty Begaıym Esenǵalıevanyń usynysymen №9 saılaý okrýginde ornalasqan saıabaqqa 200 túp aǵash kósheti egildi. Izgi sharaǵa aýdan basshysy Alpamys Kóshkinbaev, ákimdik qyzmetkerleri, aýyl turǵyndary, muǵalimder qatysty.
«Taza Qazaqstan» aksııasy – keleshekti kózdegen bastama. Búgin egilgen terek erteńgi urpaǵyńa saıa bolady, jemisin beredi. Sondyqtan mundaı ıgilikti istiń sońy bolmaýy kerek.
Batys Qazaqstan oblysy
