Almatyny aıalaı bileıik!

Qala ákimdiginiń bastamasymen aksııa bastalǵan kúnnen «Almaty – ortaq úıimiz» naýqany qyzý qolǵa alyndy. Qalalyq ınfraqurylymǵa uqyp­ty qaraý, halyq arasynda azamattyq jaýap­kershilikti nasıhattaý, tur­ǵyndardy ekologııalyq máde­nıetke tárbıeleý maqsatynda uıymdastyrylǵan aksııa barysynda qalanyń barlyq aýdanynda túrli ekologııalyq is-sharalar keńinen óris aldy. Aýdandyq ákimdikter men kommýnaldyq qyzmetter kóshelerdi, úıishilik aýmaqtardy, balalar men sport alańdaryn retke keltirdi. Jasyl aımaqtardy – saıabaqtar, ózen-kólder aýmaqtaryn tazalaýǵa erekshe mán berildi. Sondaı-aq mádenıet nysandaryn, tarıhı oryndar men ǵımarattardy jınaý, qalpyna keltirý jumystary uıymdastyryldy. Kommýnaldyq qyzmet qyzmetkerleri arasynda túrli nomınasııalar boıynsha konkýrs ótkizildi.

«Almaty – ortaq úıimiz» naý­qany aıasyndaǵy qalalyq senbilik komıýnıtı-ortalyqtaryn da qamtydy. Jastar jyl boıy ekolo­gııalyq ahýaldy jaqsartýdy kózdeıtin bastamalarǵa turaqty túrde qatysty. Qalalyq jastar saıasaty basqarmasynyń málimetinshe, 2024 jyldyń basynan beri bul ortalyqtarda 1500-den astam is-shara, onyń ishinde dárister, semınarlar, eko-aksııalar, ıntellektýaldyq oıyndar, sheberlik sabaqtary, akýstıkalyq keshter, sporttyq týrnırler ótken. Sharalarǵa 375 myńnan astam adam qatysqan, onyń 27 myńy – NEET sanatyndaǵy jastar.

Bıyldan bastap árbir komıý­nıtı-ortalyqta elimizde jasalǵan fandomattar, plas­tıkalyq bó­telkeler men alıýmınıı bankalardy jınaý apparattary ornatyldy. «Plastic reboot» aksııasy aıasynda komıýnıtı-ortalyqtar 1 tonna plastık qaqpaq jınaǵan. Ekologııalyq aksııalardy uıymdastyrýǵa muryndyq bolyp júrgen mekemeler Baýman toǵaıyn da tazalady. Bir sózben, qalalyq kommýnaldyq qyzmet salasy Almatyny qysqy maýsymǵa daıyndaý jumystaryn sátti aıaqtady.

Qysta qala tazalyǵyn qamta­masyz etýge 841 arnaıy tehnıka men 1 400 jumysshy jumyldyrylady. Jumys tıimdiligin arttyrý maq­sa­tynda «Almaty Tazalyq» kom­mýnaldyq kásip­ornynyń avtoparki 32 zamanaýı tehnıkamen tolyqty. Sanıtarlyq tazalyq 2 318 kósheni, jalpy aýdany 25,1 mln sharshy metr aýmaqty, uzyn­dyǵy 2 777 km bolatyn joldardy qamtıdy. Kóshe, jol jelisin tazartý ju­mystaryna 10 merdiger uıym jaýapty.

ALMATY