Atap aıtqanda, KAZENERGY qaýymdastyǵy men Qazaqstannyń munaıshy-geologtar qoǵamy QB arasyndaǵy áriptestik týraly kelisimge jáne atalǵan qoǵam men «Energııa» taldaý ortalyǵy (KAZENERGY enshiles kompanııasy) arasyndaǵy yntymaqtastyq týraly memorandýmǵa qol qoıyldy.
KAZENERGY qaýymdastyǵynyń Bas dırektory Jandos Nurmaǵanbetovtiń aıtýynsha, Qazaqstannyń munaıshy-geologtar qoǵamymen kópjyldyq yntymaqtastyq – forýmdar, konferensııalar, birlesken jobalar sııaqty baǵyttardy qamtıdy. Bul ózara is-qımyldyń mańyzdy kezeńderiniń biri – 2010 jyly Qazaqstannyń munaı-gaz jáne geologııalyq salalaryn damytýǵa baǵyttalǵan áriptestik týraly shartqa qol qoıý boldy. Jańa kelisim jańa perspektıvalar ashatyn jáne ózara árekettesý múmkindikterin keńeıtetin zamanaýı tendensııalardy, ınnovasııalardy, ǵylymı ázirlemelerdi eskeredi.
Kópjyldyq eńbektiń nátıjesi ispetti «Qazaqstan munaı jáne gaz ken oryndarynyń alǵash ashýshylary» atty kitapty KAZENERGY qaýymdastyǵyna syıǵa tartqan Qazaqstannyń munaıshy-geologtar qoǵamynyń prezıdenti Baltabek Qýandyqov áriptestik qatynastardy nyǵaıtýdyń mańyzdylyǵyn atap ótti. Aıtýynsha, Qashaǵan ken ornynyń ashylýyna oraılastyrylǵan birlesken ǵylymı-praktıkalyq konferensııa yntymaqtastyqtyń mańyzdy kezeńi bolmaq. 2025 jyly ótetini josparǵa alynǵan atalǵan is-shara – munaı-geologııa salasy mamandary arasynda usynystar men úzdik tájirıbelerdi almasýǵa jáne sektordyń odan ári damýyna yqpal etýge arnalǵan.
Qol qoıylǵan qujattar – taraptardyń seriktestikti nyǵaıtý, ınnovasııalardy damytý, Qazaqstannyń munaı-gaz jáne geologııalyq salalarynda quzyrettilik deńgeıin arttyrý turǵysyndaǵy umtylystaryn kórsetedi. Kelisimder munaı-gaz salasyn ornyqty damytý, aqparattyq-taldamalyq zertteýler júrgizý, statıstıkalyq jáne taldamalyq materıaldar daıyndaý sııaqty salalardaǵy yntymaqtastyqty keńeıtýge baǵyttalǵan. Sonymen qatar olar ulttyq jáne halyqaralyq kásibı arenada taraptardyń oń ımıdjin qalyptastyrýǵa yqpal etetin bolady.
