Fotolar: Aqorda
Qazaqstannyń tóraǵalyq mindeti tolyq oryndaldy
Shaǵyn quramdaǵy sessııada Qazaqstannyń Uıymǵa tóraǵalyǵy kezinde qoıylǵan mindetterdiń bári oryndalǵanyn aıtqan Qasym-Jomart Toqaev:
«Uıymnyń jarǵylyq organdarynyń otyrystary, áskerı oqý-jattyǵý jıyndary jáne profılaktıkalyq operasııalar josparly túrde uıymdastyryldy. Syrtqy ister jáne qorǵanys mınıstrleri ujymdyq qaýipsizdiktiń ózekti máselelerin qarastyrdy. Qaýipsizdik keńesi hatshylary men parlament spıkerleriniń deńgeıinde kezdesýler ótti. Uıymnyń qosymsha jáne jumys organdarynyń keńesteri ótkizildi. UQShU qyzmetiniń túrli baǵyttary boıynsha konsýltasııalar jasaldy. Sessııa aralyq kezeńde birqatar mańyzdy qujat qabyldandy. Bular halyqaralyq yntymaqtastyq, qorǵanys salasyndaǵy yqpaldastyq, sondaı-aq ujymdyq qaýipsizdiktiń ózekti syn-qaterleri men qaýipterine qarsy is-qımyl máselelerin qamtıdy. Uly Jeńistiń 80 jyldyǵyn atap ótýge qatysty daıyndyq jumystaryna aıryqsha mán berildi», dedi.
Jıyn barysynda halyqaralyq jáne óńirlik qaýipsizdik máseleleri talqylandy. Buǵan qosa Qazaqstan Respýblıkasynyń 2024 jyly UQShU-ǵa tóraǵalyǵy qorytyndylandy jáne aldaǵy kezeńniń jospary naqtylandy.
Syn-qaterlerge qarsy kúres tetikteri jolǵa qoıyldy
UQShU Ujymdyq qaýipsizdik keńesiniń keńeıtilgen quramdaǵy otyrysynyń sessııa jumysyn ashqan Prezıdent Qasym-Jomart Toqaev sóılegen sózinde Qazaqstannyń UQShU-ǵa tóraǵalyǵy aıasynda Uıym jarǵysyna saı yntymaqtastyq baǵyttary boıynsha 60-qa jýyq is-shara uıymdastyrylǵanyn, halyqaralyq arenada kelisilgen ustanymdardy ilgeriletý boıynsha seriktestermen birlese jumys júrgizilgenin aıtty.
«Bıyl qabyldanǵan saıası qujattar legine UQShU-ǵa múshe memleketterdiń jalpy baǵalaýy negiz boldy. Olardyń ishinde halyqaralyq aqparattyq qaýipsizdik, ǵarysh salasyndaǵy yntymaqtastyq máseleleri men Taıaý Shyǵystaǵy ahýalǵa baılanysty, sondaı-aq Belorýssııany basqynshylardan azat etýdiń 80 jyldyǵyna oraı qabyldanǵan málimdemeler bar. Jyl boıy ujymdyq qaýipsizdik júıesiniń kúshteri men quraldarynyń áskerı daıyndyǵyna muqııat nazar aýdaryldy», dep aıtqan Memleket basshysy Qasym-Jomart Toqaev UQShU-ǵa múshe elderdiń bitimgerlik kúshteriniń daıyndyq deńgeıi men jaýyngerlik mashyǵyn jetildirý jumystary júrgizilip jatqanyn, qyrkúıek-qazan aılarynda elimizde «Myzǵymas baýyrlastyq-2024» UQShU Bitimgershilik kúshteriniń komandalyq-shtabtyq oqý-jattyǵýlary men «Jartas-2024» UQShU arnaıy oqý jıyny ótkizilgenin, asa qaýipti nysandardaǵy kúrdeli apattyq-qutqarý jumystaryn júrgizýdiń birlesken is-qımyly pysyqtalǵanyn atap ótti.
Qasym-Jomart Toqaev jyl boıy ózekti syn-qaterlerge qarsy is-qımyl máselesine erekshe den qoıylǵanyn, Qazaqstan aıqyndaǵan basymdyqtar júıeli júzege asyrylǵanyn atap aıtty.
«Qazaqstan men UQShU-ǵa múshe basqa da elder aýmaǵynda bir ýaqytta «Naemnık», «Kanal», «Nelegal» jáne «PROKSI» sekildi arnaıy operasııalardyń túrli kezeńderi ótti. Bul is-sharalar halyqaralyq terrorızmge, esirtki saýdasyna, zańsyz kóshi-qonǵa jáne aqparattyq ortadaǵy syn-qaterlerge qatysty qaýiptiń aldyn alýdy kózdeıdi. Bıyl bizdiń bastamamyzben alǵash ret zańsyz qarý-jaraq, oq-dári aınalymyna jáne uıymdasqan transulttyq qylmysqa qarsy is-qımyl jóninde konsýltasııalar ótti. UQShU aıasynda arnaýly jumys tobyn qurý máselesi pysyqtalyp jatyr. Qazaqstan tóraǵalyǵynyń úılestirýimen Tájik-aýǵan shekarasyn nyǵaıtý jónindegi UQShU-nyń maqsatty memleketaralyq baǵdarlamasyn daıyndaý jumystary aıaqtaldy. Qujatty ázirleý 2013 jyly bastalǵan edi. Búgin biz Uıymnyń ońtústik shebindegi qaýipsizdikti nyǵaıtýǵa baǵyttalǵan osy mańyzdy sheshimge qol qoıamyz», dedi Memleket basshysy.
Eske salaıyq, Qazaqstan 2024 jyldyń 1 qańtarynan bastap UQShU-ǵa tóraǵalyq etti.
Deklarasııa qabyldanyp, birqatar qujattarǵa qol qoıyldy
Uıymnyń jáne onyń barlyq músheleriniń múddesi úshin ujymdyq qaýipsizdik júıesin odan ári jan-jaqty damytýǵa baǵyttalyp qabyldanǵan qujattar tizimi:
UQShU-nyń tájik-aýǵan shekarasyn nyǵaıtý jónindegi maqsatty memleketaralyq baǵdarlamasy bekitildi.
Prezıdentter sondaı-aq 1941-1945 jyldardaǵy Uly Otan soǵysyndaǵy Jeńistiń 80 jyldyǵy týraly Málimdeme qabyldady jáne bul datany 2025 jyly atap ótý jónindegi is-sharalar josparyn bekitti.
