«Taza Qazaqstan» aksııasy turaqty jobaǵa aınaldy
2024 jyldyń sáýirinde Memleket basshysynyń bastamasymen «Taza Qazaqstan» ekologııalyq aksııasy bastaldy. Bastapqyda bul shara 8 sáýir men 13 mamyr aralyǵynda ótedi dep josparlanǵan bolatyn. Ár apta naqty taqyryptarǵa arnaldy: «Taza ólke», «Kıeli meken», «Jasyl aımaq», «О́negeli urpaq», «Móldir bulaq». Alaıda halyqtyń keń qoldaýynyń arqasynda aksııa uzartylyp, jyl boıy jalǵasatyn turaqty jobaǵa aınaldy.
Aksııaǵa 5,83 mıllıonnan astam azamat qatysyp, 1,1 mıllıon tonnadan asa qoqys jınalyp, 1,6 mıllıon aǵash otyrǵyzyldy. Uzaq merzimdi nátıjelerdi qamtamasyz etý úshin 2024-2029 jyldarǵa arnalǵan ekologııalyq mádenıetti damytý tujyrymdamasy bekitildi.
«Taza Qazaqstan» — bul bir rettik shara emes, ekologııalyq jaǵdaıdy jaqsartyp, halyqtyń ekologııalyq sanasyn arttyrýǵa arnalǵan júıeli joba.
AES qurylysyn júrgizýdi halyq qalady
6 qazanda Qazaqstanda AES qurylysy týraly referendým ótti. Nátıjesinde 71,12% azamat atom elektr stansııasyn salý ıdeıasyn qoldady. Referendýmǵa 7,82 mıllıon adam (63,66%) qatysty. Bul sheshim tek tehnologııalyq progress pen energetıkalyq qaýipsizdikke baǵyttalǵan qadam emes, sonymen qatar el azamattarynyń saıası ómirge belsendi qatysatynyn kórsetetin mańyzdy belgi.
Memleket basshysy AES qurylysyn halyqaralyq konsorsıým arqyly júzege asyrý ıdeıasyn qoldaıtynyn aıtty. Bul Qazaqstan úshin qaýipsiz ári zamanaýı sheshimderdi qamtamasyz etedi.
Rekordtyq deńgeıde astyq jınaldy
Elimizde aýyl sharýashylyǵy salasynda aıtarlyqtaı jetistikke qol jetkizildi. Agrarlyq sektor jumystarynyń nátıjesinde 2024 jyly ortasha ónimdilik 16,1 s/ga bolyp, jalpy 26,7 mıllıon tonna astyq jınaldy. Salystyrmaly túrde, 2023 jyly ortasha ónimdilik 10 s/ga bolǵan edi. Bul rekord agrarlyq sektordyń damýyndaǵy mańyzdy qadam ekenin kórsetedi.
Ýaqyt beldeýi aýysty
Qazaqstan Respýblıkasy Úkimetiniń 2024 jylǵy 19 qańtardaǵy №20 qaýlysyna sáıkes «Qazaqstan Respýblıkasynyń aýmaǵynda ýaqytty esepteý tártibi týraly» 2024 jylǵy 29 aqpannan bastap 2024 jylǵy 1 naýryzǵa qaraǵan túni (saǵat 00:00-de) ýaqytty 1 saǵatqa artqa aýystyrýdy kózdeıtin ózgerister engizildi.
Osylaısha, 29 aqpannan 1 naýryzǵa qaraǵan túni elimiz biryńǵaı ýaqyt beldeýine aýysyp, saǵat tili bir saǵatqa artqa jyljydy.
Jyldyń rezonans týdyrǵan sot prosesi
Jurt arasynda dúrbeleń týdyryp, álem nazaryn ózine qaratqan sot prosesteriniń biri - Qýandyq Bıshimbaev isi. Onyń ashyq onlaın formatta uıymdastyrylýy qoǵam nazaryn aýdaryp, turmystyq zorlyq-zombylyqqa qarsy zańdardyń qabyldanýyna yqpal etti.
2024 jyl osylaısha Qazaqstannyń áleýmettik, ekonomıkalyq jáne saıası damýyndaǵy jańa belesterdi kórsetip, el tarıhynda mańyzdy jyldardyń biri retinde este qaldy.
2024 jyl Qazaqstan úshin ekonomıkalyq ósimniń, saıası turaqtylyqtyń jáne mádenı jańǵyrýdyń jyly boldy. Elde júzege asyrylǵan reformalar men sharalar memlekettiń damýyndaǵy jańa kezeńniń bastamasy retinde tarıhta qalady. Qazaqstan halqynyń birligi men yntymaǵy eldiń bolashaǵyn jarqyn etýge septigin tıgizip otyr.
