Toǵyz myń balaǵa tartý

Zamanaýı ortalyqtyń ar­qa­synda kenshiler sha­harynda bos ýaqytyn tıim­di ótkizýge múmkindik alǵan ba­lalar sany 16 myńnan astam oqý­shyǵa ulǵaıdy.

Jobanyń jalpy quny – 5,3 mlrd teńge, «ERG» jáne «Kaz­MineralsBozshakol» toptarynyń demeýshilik qarajaty esebinen tur­ǵyzyldy. Jalpy aýdany 7200 sharshy metrdi quraıtyn zamanaýı ortalyqta 9 myńnan astam bala, onyń ishinde erekshe qajettiligi bar balalar 12 baǵyt boıynsha qosymsha bilim alýǵa, ýaqytta­ryn qyzyqty ótkizýge, ózderin da­mytý­ǵa múmkindik aldy. Ortalyq erekshe qajettilikteri bar balalarǵa tolyqtaı beıimdelgen, lıft jáne kótergish qurylǵylarmen, tıflo jáne sýrdoqurylǵylarmen jabdyqtalǵan.

– Men búgin Memleket basshy­sy Qasym-Jomart Toqaevtyń tike­leı tapsyrmasymen salynǵan ın­novasııalyq «Samǵaý» balalar shy­ǵarmashylyǵy ortalyǵynyń ashylý saltanatyna qatysqany­ma óte qýanyshtymyn. «Samǵaý» ken­shiler qalasynyń balalary men jastaryn tartatyn ortalyq bolatynyna senimdimin, – dedi óńir basshysy Asaıyn Baıhanov. Ákim jas urpaqtyń úılesimdi damýy úshin asa qajetti jobany iske asyrýǵa jáne nysannyń qurylysyna qatys­qan­dardyń barlyǵyna alǵysyn bildirdi.

Ǵımarattyń birinshi qabatynda bı zaly, teatrlyq jattyǵý zaly, jeke vokal men mýzyka sabaqtaryna arnalǵan bólmeler jáne 275 oryn­dyq úlken aýdıtorııa ornalasqan. Balalar ortalyq jumysynyń shy­ǵar­mashylyq baǵyttarynan horeografııa (halyqtyq, zamanaýı jáne klassıkalyq bıler), teatr óneri, vokal jáne hor áni nemese aspaptyq sheberlik (dombyra, qobyz, gıtara, mandolına, daýylpaz, asataıaq, shertpe) boıynsha sabaqtardy tańdaı alady.

Ekinshi qabatta jasyl tehnologııalar ortalyǵynyń ǵy­ly­mı-bıologııalyq zerthanasy (gıdro já­ne ekoponıka) men land­shafttyq sáýlet jáne flo­rıs­tıkalyq dızaın stýdııalary, sondaı-aq, pikirtalas ortalyǵy, medıa ortalyq (dybys jazý stýdııasy, telestýdııa, fotogra­fııa akademııasy, jas bloger stýdııa­sy, kovorkıng ortalyǵy), sán stý­dııasy (makııaj ben kostıým sý­­ret­shi­si, ınterer dızaıny) orna­las­­­qan. Al úshinshi qabat tolyǵymen ro­bo­t-­­tehnıka jáne kompıýterlik mo­del­deý, ǵaryshtyq radıobaı­la­nys já­ne radıotehnıka klýbtaryn, STEM jáne LEGO zerthanala­ryn, UUA (ushqyshsyz ushý apparaty) klýbyn qosa alǵanda IT tehnologııa­­lar­ǵa, sondaı-aq balalar pishim men tigin­di, modeldeý­di, keramıkany, beı­neleý óneri men aspazdyq óner­di úırenýge múmkindik beretin kór­kemdik-qol­danbaly blokqa beril­­di. Buǵan qo­sa ata-analar men bala­­lar­ǵa arnal­ǵan psıhologııalyq-peda­gogıka­lyq qol­daý kabıneti, ústel ten­nısi­ne arnalǵan aımaqtar, emdik dene shynyqtyrý jáne jattyǵý zaly ju­mys isteıtin bolady.

Ata-analar úıirmeleriniń bar­lyǵyn tegin túrde usynyp otyr­ǵan or­talyqtyń ashylǵanyna rıza­shy­lyqtaryn jetkizdi.

«Balalarymyz jańa dú­nıe­lerdi úırenip, bilim alýlary úshin qalamyzda osyndaı ortalyqtyń ashylǵany qýantarlyq. Osyn­daı zamanaýı ǵımaratty salýǵa tapsyrma bergen Prezıdentimizge rızamyz. Shyǵarmashylyq úıir­mege jazylýdy josparlaǵanbyz, biraq, munda kóptegen qyzyqty úıirmeler bar eken, endi basqa da baǵyttar­ǵa qatysýdy oılap otyrmyz», deıdi qala turǵyny Aıana Smaǵulova.

Búginde ortalyqta jumys is­teýge 50-den astam qosymsha bilim berý pedagogteri tartyldy.

Ertis-Baıan óńi­rinde óskeleń urpaqtyń úılesimdi damýy úshin barlyq jaǵdaı jasalyp otyr. Buǵan deıin 800 balaǵa arnalǵan shyǵarmashylyq ortalyq Ertis aýdanynda ashylsa, Pavlodar qalasynda «Altyn saqa» balalar shyǵarmashylyǵy jáne demalys ortalyǵy esigin aıqara ashty. Al aldaǵy úsh jylda Ýspen, Sharbaqty jáne Pavlodar aýdandarynda oqýshylardyń qyzy­ǵýshylyqtary men talanttaryn damytýǵa jol ashatyn óner mek­tepterin salý josparlanǵan.

Pavlodar oblysy,

Ekibastuz qalasy