Bul kópten kútken oqıǵa «Samuryq-Qazyna» qorynyń qoldaýymen júzege asty. Ortalyqtyń qyzyl lentasyn «Astana Opera» teatrynyń dırektory Ǵalym Ahmedıarov, «Samuryq-Qazyna» AQ basqarma tóraǵasy Nurlan Jaqypov, «Samruk-Kazyna Trust» KQ bas dırektory Alfııa Ádıeva qıdy.
Atalǵan ortalyqty ashý jaıy óner ıeleri arasynda kópten beri másele etip kóterilip júrgen túıtkildiń biri bolatyn. Sonyń is júzinde sheshilgenine olar shyn qýanyshty. Endi teatr ártisteri men tehnıkalyq ujym fızıkalyq júktemeler men jaraqattan keıin qalypqa kelý úshin mamandandyrylǵan ońaltý kabınetiniń kómegine júgine alady. Sebebi teatr óneri jan-tánińmen berilýdi talap etedi. Árbir spektakl – aılar boıǵy daıyndyq, kúsh-jiger men kóbinese kásibı jaraqattarǵa alyp keletin fızıkalyq júkteme. Osy ýaqytqa deıin otandyq ártister óz kúshine ǵana senetin, bolmasa oqys jaǵdaıda jalpy beıindik emhanalarǵa júginetin. Endi ońaltý kabınetiniń arqasynda kásibı kómek qoljetimdi bola tústi. Kabınettiń ishi bulshyq etti qalpyna keltirýge, aýyrsynýdy basýǵa ári túrli emsharalardy júrgizýge arnalǵan zamanaýı quraldarmen jabdyqtalǵan. Dál osy jerde ártisterdiń qalypty jumysyna tezirek oralýyna qalaı kómektesýdi biletin reabılıtolog mamannyń da keńesin alýǵa bolady.
«Biz úshin qyzmetkerlerdiń densaýlyǵy birinshi kezekte, sebebi olar teatrdy jandy, ómirsheń, jigerli etedi, dep atap ótti Qazaqstannyń eńbek sińirgen qaıratkeri, «Astana Opera» dırektory Ǵalym Ahmedıarov. – Osynaý jobanyń mańyzdylyǵyn túsinip, qoldaý kórsetkeni úshin «Samuryq-Qazyna» qoryna rızashylyǵymyzdy bildiremiz. Bul – teatrymyz úshin ǵana emes, elimizdiń tutas teatr salasy úshin jasaǵan eleýli qadamy, – dedi teatr basshysy.
Ońaltý kabınetiniń ashylýy – teatr ómirindegi jańa kezeńniń belgisi. О́ziniń aýqymdy qoıylymdary hám trýppanyń joǵary kásibıligimen tanymal «Astana Opera» taǵy da ınnovasııalyq izdenistiń úlgisine aınaldy. Endi teatr ártisteri densaýlyqtarynyń senimdi qolda ekenin bilgendikten, bar zeıinderin basty qundylyq – shyǵarmashylyqqa aýdara alady.
