Sýretti túsirgen – Aqádil Rysmahan
Birshama ýaqyt buryn jergilikti atqarýshy bıliktiń pármenimen «Asqaq rýhty Áýlıeata» atty ádebı-mádenı baıqaý jarııalaǵan bolatyn. Tarazda týyp, Alashqa tanylǵan qalamgerlerdiń rýhyn ulyqtaý, esimin umytpaý maqsatynda uıymdastyrylǵan baıqaýda Sherhan Murtaza, Nesipbek Dáýtaıuly, Shona Smahanuly, Arǵynbaı Bekbosyn sekildi baqılyq bolǵan ózge de qalamgerler atyndaǵy syılyqtar taǵaıyndaldy. Al ádebı-mádenı baıqaýǵa elimizdiń ár qıyrynda turatyn esimi elge belgili zııaly qaýym ókilderi qatysty.
Respýblıkalyq baıqaýdyń qorytyndysy shyǵarylǵan is-shara «Asqaq rýhty Áýlıeata» atty poezııa keshine ulasty. Is-sharaǵa arnaıy kelgen mártebeli meımandar men jergilikti jastar jańa týyndylaryn oqyp, kópshilik kórermenniń ystyq yqylasyna bólendi. Qalamgerler baıqaý jyl saıyn dástúrli túrde ótkizilip tursa degen tilegin bildirdi.
«Bul is-shara osyǵan deıin uıymdastyrylǵan dúnıelerdiń ishindegi eń móldiri, eń tazasy dep bilemin. Jambyl oblysy sońǵy bir jyldyń bederinde rýhanııattyń shyraqshysyna aınaldy. Túrli formattaǵy ádebı keshter jıi ótkizilip jatqanyn kórip, bilip júrmiz. Al keıbir is-sharalarǵa arnaıy kelip qatysyp turamyn. Mundaı kezdesýler júrekte bir jyly sezim qaldyrady. Talaı tuǵyrly tulǵaǵa pana bolǵan topyraqtan ádebıetke ańsary aýǵan talantty jastardyń jarqyrap shyǵyp júrgeni de kóńil qýantady», deıdi Abaı atyndaǵy Memlekettik syılyqtyń laýreaty Ǵalym Jaılybaı.
«Asqaq rýhty Áýlıeata» atty respýblıkalyq baıqaýǵa elimizdiń barlyq qıyrynda turatyn qalamgerler qatysty. Oblys ákimdigi mádenıet jáne tilderdi damytý basqarmasynyń ókilderi keltirgen derekke júginsek, 9 atalym boıynsha uıymdastyrylǵan baıqaýǵa jalpy sany 77 qalamgerden 114 shyǵarma kelip túsken. Qatysýshylardyń shyǵarmalaryn esimi elge belgili qalamgerler zerdelep, jeńimpazdardy anyqtaǵan.
Respýblıkalyq deńgeıde uıymdastyrylǵan baıqaý qorytyndysynda «Poezııa» atalymy boıynsha Jambyl Jabaev atyndaǵy júldege áriptesimiz, aqyn Erlan Júnis laıyq dep tanylsa, Kenen Ázirbaev atyndaǵy arnaıy júlde Nurjan Qýantaıǵa buıyrdy. Al «Jyr-terme» atalymy boıynsha Aıaz Betbaev atyndaǵy júlde «Qazaq ádebıeti» gazetiniń bas redaktory, aqyn Baýyrjan Jaqypqa buıyrsa, Ábdimomyn Jeldibaev atyndaǵy júldeni Janatbek Turǵymbaev ıelendi.
Is-shara barysynda «Kórkem aýdarma», «Satıra», «Proza», «Drama» atalymdary boıynsha júzden júırik shyqqandar da marapattaldy. «Proza» atalymy boıynsha Baýyrjan Momyshuly atyndaǵy syılyq jazýshy Bolatbek Tólepbergenniń enshisine jazylsa, «Proza jáne kórkem aýdarma» atalymy boıynsha Sherhan Murtaza atyndaǵy syılyqqa Nurǵalı Oraz laıyq dep tanyldy. Sondaı-aq Nesipbek Dáýtaıuly atyndaǵy syılyqty Yrysbek Dábeı ıelendi. Al «Satıra janry» atalymy boıynsha Shona Smahanuly atyndaǵy syılyq jambyldyq Baqytjan Álimqulovqa buıyrsa, «Dramatýrgııa» atalymy boıynsha taǵaıyndalǵan Arǵynbaı Bekbosyn atyndaǵy júldeni Iranbek Orazbaev ıelendi. Júldegerlerdiń barlyǵyna 1 mln teńge kóleminde qarjylaı syılyq tabystaldy.
Jaýhar jyrlarmen ádiptelgen kesh barysynda Asqar Toqpanov atyndaǵy oblystyq qazaq drama teatrynyń akterleri qoıǵan Shyǵys shaıyrlary shyǵarmalarynan usynylǵan ádebı kompozısııa kópshiliktiń kóńilinen shyqty. Janǵa jaıly atmosferada ótken poezııa merekesinde Kenen Ázirbaev atyndaǵy oblystyq fılarmonııa ánshileri Bahrom Mýmınov, Dıas Álibekov Abaıdyń «Jelsiz túnde jaryq aı» shyǵarmasyn shyrqaý shegine jetkize oryndasa, ánshi-kompozıtor Aqqý Baıjigit áriptesimiz Erlan Júnistiń óleńine jazylǵan «Sen turatyn qalada qar jaýdy ma?» ánin oryndap berdi.
Poezııa keshine arnaıy kelgen mártebeli meımandar alǵash ret uıymdastyrylǵan «Asqaq rýhty Áýlıeata» atty is-sharanyń joǵary deńgeıde ótkenin aıtyp jatty. Sondaı-aq qalamgerler qaýymy aldaǵy ýaqytta jasyndaı jarq etip sóngen aıtýly aqyn Artyǵalı Ybyraev, Serik Tomanov, Jaqsylyq Sátibekov sekildi qalamgerlerdiń esimi de eskerilse degen tilekterin tilge tıek etti.
«Mundaı rýhanı is-sharalardyń jıi uıymdastyrylǵany jón dep bilemin. О́ıtkeni osyndaı keshterde elimizdiń ár qıyrynda turatyn qalamgerlerdiń basy qosylady. Pikir almasady. Kitaptyń nasıhaty týraly áńgimeler aıtylady. Sol turǵydan alǵanda Tarazdaǵy is-shara kóńilge qondy» deıdi «Proza» atalymy boıynsha Nesipbek Dáýtaıuly atyndaǵy syılyqty ıelengen qalamger Yrysbek Dábeı.
Jambyl oblysy
