Almaty qalasy Tótenshe jaǵdaılar departamenti basshysynyń orynbasary Kárimjan Rahmannyń aıtýynsha, jyl saıyn Almatyda jańa jyldy merekeleý kezinde orta eseppen 11 órt oqıǵasy tirkeletin kórinedi. Oqys oqıǵalardyń basym bóligi pırotehnıkalyq buıymdarǵa baılanysty bolady. Sońǵy bes jylda osyndaı sebeppen 57 órt tirkelgenin alǵa tartqan maman, megapolıs turǵyndary saqtyq sharalaryna salǵyrt qaramasa deıdi.
«31 jeltoqsan otshashýsyz ótpeıtini belgili. Alaıda osy faktordyń sebebinen densaýlyǵyna túrli deńgeıde zaqym keltirip, tipti úıin nemese kóligin órtke orap alyp jatqandar az emes. Byltyr mereke kúni Almatyda 18 adam, onyń ishinde 11 bala pırotehnıkany durys paıdalanbaý saldarynan alǵan jaraqattaryna baılanysty medısınalyq kómekke júgindi. Olardyń arasynda kórý qabiletine zııan tıgender de bar. Biz balalarǵa otshashýlar men petardalardy ushyrýǵa jol bermeýdi usynar edik. Bul qaıǵyly oqıǵalardy boldyrmaýǵa kómektesedi», deıdi qalalyq jedel járdem qyzmeti dırektorynyń orynbasary Andreı Lojkın.
Tártip saqshylary Almatyda «Pırotehnıka» operasııasy júrip jatqanyn habarlady. 19 jeltoqsandaǵy jaǵdaı boıynsha pırotehnıkalyq ónimderdiń 141 qoraby jáne birneshe ret atylatyn «VIP Salıýt» otshashýlarynyń 125 danasy tárkilengen. Pırotehnıkany zańsyz satýdyń 22 faktisi anyqtalǵan bolsa, tárkilengen ónimniń jalpy salmaǵy 365 kg quraǵan. Polıseıler bul baǵyttaǵy jumys jalǵasa beretinin jetkizdi.
«Zańsyz saýda aınalymy sapasyz taýarlardyń jappaı satylýyna ákeledi. Saldarynan túrli keleńsiz oqıǵalar oryn alýy yqtımal. Osy sebepti baqylaýdy barynsha kúsheıtip, áriptesterimiz qalanyń ár núktesin muqııat qadaǵalaıdy. Qala aýmaǵynda 145 mobıldi top jumys isteıdi. Bizdiń mindetimiz — qaýipti ónimderdi satýdyń aldyn alý jáne ásirese kámeletke tolmaǵandar arasynda jaraqat alý qaýpin boldyrmaý», deıdi Ákimshilik polısııa basshysynyń orynbasary Tımýr Serikuly.
Jaýapty mamandar qaladaǵy 72 shyrsha men 17 muz aıdyny aýmaǵyna tekseris júrgizip, menshik ıelerine órt qaýipsizdigi sharalaryn kúsheıtý boıynsha usynys bergen. Qaıǵyly jaǵdaılardy boldyrmaý úshin Almaty turǵyndaryn Jańa jyldy merekeleýge jaýapkershilikpen qaraýǵa shaqyrǵan mamandar pırotehnıkamen qaýipsiz jumys isteýdiń negizgi erejelerin eske saldy. Mamandar keńesine mán bersek, ónimderdi tek arnaıy dúkenderden satyp alý, qaptamanyń tutastyǵyn jáne jaramdylyq merzimin tekserý, pırotehnıkany jylý men ylǵaldan alys ustaý, otshashýdy tutatar kezde adamdardan, ǵımarattardan jáne aǵashtardan 50 metr qashyqtyqty saqtaý, fıtıldi tutatý kezinde ónimge eńkeımeý, 16 jasqa deıingi balalardyń óz betinshe tutatýlaryna jol bermeý oqys oqıǵalardyń aldyn alýǵa yqpalyn tıgizedi.
Degenmen keıingi jyldary pırotehnıkalyq otshashýlardy tutyný deńgeıi tómendegen. Soǵan sáıkes, zardap shegýshiler sany da sıregen. Aıtalyq, 2017 jyly jańa jyl túninde pırotehnıkadan zardap shekken 117 turǵyn aýrýhanaǵa júgingen bolsa, 2018 jyly 120-dan astam almatylyq túrli deńgeıde jaraqat alǵan. Olardyń arasynda denesiniń 50 paıyzdan astamyn kúıik shalyp, ókinishti jaǵdaıda qalǵandar bar.
ALMATY
