Sýret «Egemen Qazaqstannyń» arhıvinen alyndy
80 jyl – eki-úsh býyn almasyp, kóneniń ornyn jańa basar merzim. Maıdan dalasynda qan keship, qantógisti kózben kórgen batyrlarymyzdyń deni «kelmestiń kemesine» minip, máńgilik mekenge qonys aýdardy. Soǵys ýaǵynda tyldaǵy aýyr jumystyń qamyty moınyn qajaǵan ata-ájelerimizdiń de qarasy setinep, sol bir aýyrtpalyqty jyldardy ózderimen birge áketip jatyr. Túıindeı aıtsaq, ár áýlettiń janyna túsken jarany ýaqyttyń ózi jazdy. Dese de tarıhtan sabaq alý, oǵan jańa zaman kózimen baǵa berý kún tártibinen túspek emes.
Qazaqstannyń Ujymdyq qaýipsizdik týraly shart uıymynyń tóraǵalyǵy aıasynda atqarǵan jumystaryn qorytyndylaǵan jıynda Memleket basshysy Qasym-Jomart Toqaevtyń Ekinshi dúnıejúzilik soǵystaǵy Jeńistiń 80 jyldyq mereıtoıynyń mánine keńirek toqtalyp, «Uly Jeńistiń 80 jyldyǵyn merekeleýge erekshe mán berilýi kerek. Ardagerlerdiń maıdandaǵy jáne tyldaǵy erligin esimizde máńgi saqtap, maqtan tutý, qurmetteý – paryzymyz. Aıtýly mereke qarsańynda UQShU Ujymdyq qaýipsizdik keńesiniń málimdemesin qabyldaý, sondaı-aq Uly Jeńistiń 80 jyldyǵyna oraı ortaq merekelik is-sharalar josparyn bekitý mańyzdy dep sanaımyz» deýi sol biz aıtqan «tarıhtan sabaq alý» degen oımen úndesetindeı.
Ras, Ekinshi dúnıejúzilik soǵystaǵy jeńisti, qan maıdandaǵy jalpy halyqtyq erlikti árkim ózine telıtin psıhologııa beleń alyp turǵanyn eshkim joqqa shyǵara almaıdy. Bul jeńis – Keńes odaǵyna múshe bolǵan TMD elderine ortaq jeńis.
Prezıdentimiz TMD-ǵa múshe memleketter basshylary keńesiniń otyrysynda da ortaq jeńis máselesine qatysty oıyn aıtyp, jeńistiń 80 jyldyǵy TMD elderiniń barlyq halqyn biriktiretin aıtýly data ekenine toqtaldy. Atyraý oblysynda ótken Ulttyq quryltaıda da: «Qazaqstan árqashan tarıhı shyndyqtyń jáne adamzat jylnamasyndaǵy eń qandy qasap týraly shynaıy kózqarastyń saqtalǵanyn qalaıdy» deı kelip, tól shejiremizdiń aqtańdaq betterin ashý úshin júıeli jumystardyń jasalatynyn, muraǵat materıaldaryn muqııat zertteý maqsatynda Qazaqstannyń Eńbek eri, Májilis depýtaty, Ulttyq quryltaıdyń múshesi Baqtyqoja Izmuhambetov jetekshilik etetin «Qazaqstannyń qaharman maıdangerleri» jobasy 56 tom eńbekti jaryqqa shyǵarǵanyn, onyń 6 tomy maıdan shebinde bolǵan áıelderge arnalǵanyn málimdedi.
Memleket basshysynyń Ekinshi dúnıejúzilik soǵystaǵy Jeńistiń 80 jyldyǵyn atap ótýge qatysty irgeli ár jıyn saıyn mán berýi, «Aıbyn» ordenniń túrli dárejesin Saǵadat Nurmaǵambetovtiń, Baýyrjan Momyshulynyń, Raqymjan Qoshqarbaevtyń esimimen ataý týraly bastama kóterýi, Taldyqorǵandaǵy áýe bazasyna áıgili ushqysh Sergeı Lýganskııdiń atyn berýdi usynýy, Mádenıet jáne aqparat mınıstri Aıda Balaeva men Reseıdiń Mádenıet mınıstri Olga Lıýbımova Jeńistiń 80 jyldyǵyna arnalǵan birlesken is-sharalar josparyn bekitýi osy jyldyń «Jeńis jyly» bolaryn aıǵaqtaıdy. Iаǵnı joǵarydaǵy 80 jyldyqqa daıyndyq barysyna qarap, Memleket basshysynyń da, buqaranyń da tarıhqa ádil baǵa berýdi kózdep otyrǵanyn baıqaýǵa bolady. Sondyqtan da 1 418 kún men túnge sozylǵan surapyl soǵystyń ár sátiniń aqıqatyn arshyp, Otan úshin otqa túsip, qurbany bolǵan bozdaqtarǵa qatysty maıdannyń aqtańdaq betterin ashý 80 jyldyqtyń basty maqsatyna aınalýy kerek.
