Foto: ashyq derekkóz
Memleket basshysynyń aıtýynsha, búgingi dúrbeleńge toly dúnıede tehnogendik sıpattaǵy apattar men tabıǵat apattary edáýir kóbeıdi. Onyń bárin eńserýge kóptegen el, sonyń ishinde damyǵan memleketterdiń ózi daıyn bolmaı jatady.
«Tótenshe jaǵdaıǵa tótep berý turǵysynan, Qazaqstan basqa eldermen salystyrǵanda laıyqty orynda tur.
Jeltoqsannyń sońǵy kúnderi Aqtaý qalasynda Ázerbaıjan áýe kompanııasynyń ushaǵy apatqa ushyrady. 38 adam qaza boldy, onyń ishinde elimizdiń 6 azamaty bar. Aýyr jaraqat alǵandar da kóp. Mundaı sátte árbir sekýnd qymbat. Qutqarýshylar, dárigerler men tártip saqshylary shuǵyl ári úılesimdi áreket etti, kásibı deńgeıi men azamattyq jaýapkershiligi joǵary ekenin kórsetti. Jaqyn jerdegi Mańǵystaý óńirlik elektr toraby kompanııasynyń jumysshylary birden kómekke keldi. Tóńirektegi turǵyndar da zardap shekkenderdi qutqarýǵa atsalysty. Azamattarymyzdyń janqııarlyǵy arqasynda barynsha kóbirek adamnyń ómirin saqtap qaldyq. Men qutqarý jumystaryna qatysqan árbir adamǵa shyn kóńilden rızashylyǵymdy bildiremin. Qazaq halqynyń apattan zardap shekkenderge janashyrlyǵy men tileýlestigi azamattarymyzdyń jappaı qan tapsyrýǵa asyqqanynan da aıqyn baıqaldy», dedi Prezıdent.
Memleket basshysy ushaq apatynyń sebebin anyqtaý úshin Úkimet komıssııasy qurylǵanyn atap ótti. Sonymen birge elimizge 17 halyqaralyq sarapshy shaqyryldy. Onyń ishinde Halyqaralyq azamattyq avıasııa uıymynyń jáne Memleketaralyq avıasııa komıtetiniń mamandary bar.
«Úkimet komıssııasy málimettiń bári jazylǵan arnaıy qurylǵyny sol ushaqty jasaǵan Brazılııa eline jiberý týraly sheshim qabyldady. Bul qadam tergeý jumystarynyń obektıvti ári beıtarap júrgizilýine qajetti birden-bir durys sheshim ekenine senimdimin», dep túıindedi Qasym-Jomart Kemeluly.
